Qazaqstan Musylmandary dini basqarmasy Covid-19 koronavirýsine qatysty málimdeme jasady, dep habarlaidy QazAqparat.
Málimdeme Qazaqstan Musylmandary dini basqarmasynyń resmi saitynda jariialandy.
«Búginde búkil álem halqyna koronavirýs qaýpi úrei seýip, derttiń ózinen góri kúnnen-kúnge órshelene túsken daqpyrty men dabyly dúniejúzin dúrliktirýde. Jańalyqtan da estitinimiz, jan-jaqtaǵy jurttyń kóbi shekarasyn qymtap, qaýiptiń betin alǵan birqatar saqtyq sharalary júzege asyrylǵan. Allaǵa shúkir, atalmysh derttiń bizdiń elimizde belgisi de joq, shetten kelgen azamattarymyz din aman.
Alaida, «Saqtansań – saqtaimyn» demekshi, tórtkúl álemge túgel qaýip tóndirgen dertke nemqurailyq tanytyp, nemketti qaraý – ózimiz úshin ǵana emes, janymyzdaǵy jandardyń ómirine de áserin tigizeri bek múmkin. Osy oraida, Qazaqstan musylmandary dini basqarmasy elimizdiń árbir azamatyn qoǵamdyq oryndarda tazalyq erejelerin saqtap, óz densaýlyqtaryna asqan muqiiattylyqpen mán berip, saqtanyp júrýge shaqyrady.
Alla Taǵala qasietti Quranda adamzat balasyna: «Ózderińdi óz qoldaryńmen qaýip-qaterge salmańdar», – dep eskertý jasaǵan. Alla bergen amanat – óz ómirimiz ben densaýlyǵymyzǵa durys kútim jasamai, qaýip-qaterge kózsiz urynar bolsaq, túbinde opyq jeitinimiz sózsiz.
Bul týraly Alla elshisi (oǵan Allanyń salaýaty men sálemi bolsyn) óziniń bir ósietinde: «Kimde-kim esinese qolymen aýzyn japsyn, óitkeni ziiandy nárseler aýzyna kiredi», – dep buiyrǵan.
Sondai-aq, shariǵatta juqpaly aýrýlardyń jai kózge kórinbeitin ziiandy kúshi baryn, bilinbei taraitynyn jáne aýrýdyń etek alýyn toqtatýda karantin qajet ekeni atap aitylǵan. Óitkeni, Paiǵambarymyz (oǵan Allanyń salaýaty men sálemi bolsyn) adam balasynyń ózine de, ózgege de ziian keltýrýine qatań túrde tyiym salǵan.
Qurmetti, otandastar! Sizde jótel paida bolyp, boiyńyzda dene qyzýynyń joǵarylaýy baiqalsa nemese tynys alý qiynǵa soqqan jaǵdaida, der kezinde dárigerge júginýge, sondai-aq qoǵamdyq oryndarǵa, tipti meshitke kelýdi toqtatyp, qulshylyqtaryńyzdy úilerińizde oryndaýǵa keńes beremiz!
Alla Taǵala elimizdi, halqymyzdy túrli páleden, aýrýdan, til-kózden saqtaǵai! Ámin!»,-delingen málimdemede.
Aita keteiik, osyǵan deiin Memleket basshysy Qasym-Jomart Toqaev Úkimetke koronavirýsqa qarsy jan-jaqty shara qabyldaýdy tapsyrǵan bolatyn.
