QR Premer-Ministri Asqar Mamin men Qazaqstanǵa resmi saparmen kelgen Mońǵoliianyń Premer-Ministri Ýhnaagiin Hýrelsýh Qazaqstan-Mońǵol biznes forýmynyń ashylýyna qatysty. Sondai-aq, «Astana» halyqaralyq qarjy ortalyǵyna (AHQO) bardy. Bul týraly primeminister.kz habarlaidy.
«Qazaqstannyń Tuńǵysh Prezidenti N. Nazarbaevtyń saiasatynyń arqasynda Qazaqstan-Mońǵol qatynastarynyń ilgerilemeli damýynyń negizi qalandy. Prezident Q. Toqaev syrtqy saiasattaǵy sabaqtastyqty ustana otyryp, Mońǵoliiamen yntymaqtastyqty tiimdi damytýǵa basa mán beredi», — dedi A. Mamin.
Úkimet basshysy Qazaqstan men Mońǵoliianyń investitsiialyq yntymaqtastyqty, ásirese, taý-ken, kóliktik-logistikalyq, qurylys jáne aýyl sharýashylyǵy salalarynda keńeitý úshin úlken áleýeti bar ekenin atap ótti.
A. Mamin eki eldiń biznesmenderin iskerlik bailanystardy belsendi túrde retke keltirýge, birlesken kásiporyndar qurýǵa jáne ózara tiimdi yntymaqtastyq jobalaryn iske asyrýǵa shaqyra otyryp, Qazaqstannyń investitsiialyq ahýaly týraly aityp berdi.
Óz kezeginde Ý. Hýrelsýh Qazaqstannyń Táýelsizdik jyldary jáne naryqtyq ekonomikaǵa kóshkennen keiin ekonomikanyń turaqty damýy men qolaily investitsiialyq ahýaldy qamtamasyz ete otyryp, úlken jetistikterge qol jetkizgenin atap ótti.
«Bizde saýda-ekonomikalyq jáne investitsiialyq yntymaqtastyqty keńeitý úshin eleýli múmkindikter bar. Osy biznes forým eki el arasyndaǵy iskerlik qatynastar men ekonomikalardyń damýyna serpin beretinine senimdimin», — dedi Mońǵoliianyń Premer-Ministri.
Forým aiasynda Qazaqstan men Mońǵoliianyń iskerlik ortalarynyń ókilderi eki eldiń Úkimetter basshylarynyń qatysýymen 8 qujatqa:
- «Symbat Engineering» JShS jáne «Erdenes alt resýrs» arasyndaǵy qazaqstandyq taraptyń Mońǵoliiada altyn men kúmis óńdeý boiynsha affinaj zaýytyn salý men onyń paidalanýǵa berý týraly kelisimge qol qoidy. Bul joba Qazaqstannyń Mońǵoliiaǵa alǵashqy iri tehnologiialar investitsiiasy bolady;
- «Qazaqstan Respýblikasynyń mineraldy shikizatty keshendi óńdeý boiynsha Ulttyq ortalyǵy» RMM men mońǵoldyq «Koeýs konsalting» arasyndaǵy «Ferrosilikoaliýminiia» innovatsiialyq qorytpasyn óndirý zaýytyn salý» birlesken kásipornyn qurý týraly kelisimge;
- Qazaqstannyń Syrtqy saýda palatasy men Mońǵoliianyń Ulttyq saýda-ónerkásip palatasynyń arasyndaǵy yntymaqtastyq týraly memorandýmǵa;
- «SCAT» áýe kompaniiasy» jáne Mongolian Airways Cargo LLC arasyndaǵy ushatyn ekipajdardy, jer betinde qyzmet kórsetetin mamandardy oqytý, aviatsiialyq tehnikalyq qyzmet kórsetý týraly memorandýmǵa;
- «Antigen» ǵylymi-óndiristik kásiporny» qazaqstandyq JShS men «Global biznes link» mońǵol kompaniiasy arasyndaǵy veterinarlyq immýnobiologiialyq preparattar men diagnostikalyq testilerdiń ekijaqty eksporttyq operatsiialaryn damytý, sondai-aq, veterinarlyq preparattar óndirisi men veterinarlardy oqytý ortalyqtaryna birlesken investitsiialar týraly memorandýmdarǵa;
- «Respýblikalyq menedjment júiesin sertifikattaý ortalyǵy» JShS jáne «Ai Em Es Mon Sertf» JShB arasyndaǵy halyqaralyq standarttar negizinde menedjent júiesin sertifikattaýda yntymaqtastyq týraly kelisimge;
- «DOSFARM» JShS jáne «Mongol Em Impeks» JShB arasyndaǵy Mońǵoliia aýmaǵynda dári-dármekterdi tirkeý, ótkizý jáne ilgeriletý salasyndaǵy yntymaqtastyq týraly kelisimge qol qoidy.
Forýmǵa 200-den asa adam — eki eldiń iskerlik ortasynyń, ulttyq kompaniialarynyń, ekonomika salasyndaǵy ministrlikter men vedomstvolardyń ókiletti ókilderi qatysty. Eki eldiń saýda-ekonomikalyq jáne investitsiialyq ózara is-qimylyn damytý perspektivalary týraly QR ulttyq ekonomika ministri R. Dálenov, Qazaqstannyń Syrtqy saýda palatasynyń basqarma tóraǵasynyń orynbasary N. Bókeihanov, «QazAgro» Holdingi» AÓK AQ, «KazakhExport» eksporttyq saqtandyrý kompaniiasy» AQ, «Kazakh Invest» UK» AQ ókilderi, Mońǵoliianyń Ulttyq saýda-ónerkásip palatasynyń prezidenti O. Amartývshin, Mońǵoliianyń azyq-túlik, aýyl sharýashylyǵy jáne jeńil ónerkásip ministri Ch. Ýlaan, Mońǵoliianyń taý-ken jáne aýyr ónerkásip ministri D. Sýmiaabazar baiandama jasady.
Forým qatysýshylary ózderiniń múmkindikterin pash etip qana qoimai, B2B (business-to-business) formatynda áleýetti seriktestermen jumys kezdesýleri men kelissózder júrgizdi.
Forým ashylǵan soń A. Mamin men Ý. Hýrelsýh AHQO-ǵa baryp, onda birjany, sot pen halyqaralyq arbitraj ortalyǵyn damytý jumystarymen tanysty.
