QR Parlamenti Senatynyń jalpy otyrysynda «Qazaqstan men Ýkraina arasyndaǵy qylmystyq ister boiynsha quqyqtyq kómek týraly shartty ratifikatsiialaý týraly» Zańy qabyldandy, dep habarlaidy "Ult aqparat".
Shartqa 2018 jyldyń 29 qazanynda qol qoiylǵan.
«Jalpy, qazir eki el arasyndaǵy qylmystyq ister boiynsha quqyqtyq kómek 1993 jylǵy Minsk konventsiiasyna sáikes júzege asyrylady. Alaida atalǵan konventsiiaǵa qol qoiylǵan ýaqyttan beri zańnama men sot-tergeý tájiribesi ózgerdi. Ýkrainada kóptegen ózgerister bar.
Konventsiia men usynylyp otyrǵan shart arasynda eshqandai qaishylyq joq. Kerisinshe olar bir-birin tolyqtyrady, biraz normany naqtylaidy», - dedi QR Bas prokýrordyń orynbasary Marat Ahmetjanov.
Onyń sózine qaraǵanda, shart kúdikti men aiyptynyń kinásin dáleldeýge baǵyttalǵan keshendi protsessýldyq áreketterdi júrgizýdi qarastyrady.
«Qujat eki eldiń quzyrly organdaryna kúdikti men aiyptalýshynyń kinásin dáleldeý boiynsha keshendi tergeý jasaýǵa quqyq beredi.
Mundai ekijaqty shart 27 elmen bar. Bul kelisimniń birqatar ereksheligin aitar bolsaq, aldymen qujat quqyq qorǵaý organdarynyń ýkrainalyq áriptestermen tikelei bailanys jasaýǵa múmkindik beredi. Bul eki jaq úshin de mańyzdy norma jáne qylmyspen kúres baǵytynda ózara senimdi bildiredi. Odan basqa tergeý jumysynyń jedeldigin arttyrady. Taǵy bir erekshelik, shart boiynsha qajet jaǵdaida birlesken tergeý toptaryn qurýǵa bolady», - dedi ol.
«Shartty ratifikatsiialaý ekonomikalyq-áleýmettik jáne saiasi keri áser etpeidi. Ony iske asyrý biýdjetten qosymsha qarjy talap etpeidi», - dedi Marat Ahmetjanov.
Senat depýtattary atalǵan qujatty talqylaýdan keiin qabyldady.
