Qazaqstan men Túrikmenstan delegatsiialary ótkizgen kelissózder qorytyndysy boiynsha memleketter basshylary Qasym-Jomart Toqaev pen Gýrbangýly Berdimuhamedov buqaralyq aqparat quraldary ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti álemde qalyptasqan kúrdeli jaǵdaiǵa qaramastan, Qazaqstan men Túrikmenstannyń strategiialyq seriktestigi dostyq, tatý kórshilik jáne ózara qoldaý rýhynda turaqty damyp kele jatqanyn atap ótti.
Memleket basshysy eki taraptyń qol jetkizgen ýaǵdalastyqtary týraly aita kele, shekarany quqyqtyq turǵydan shegendeýge baǵyttalǵan kelisimderdiń mańyzyna toqtaldy.
– Búgin biz birqatar mańyzdy qujat qabyldadyq. Olardyń ishinde Kaspii teńizindegi Qazaqstan-Túrikmenstan memlekettik shekarasyn mejeleý jáne balyq aýlaý aimaqtarynyń shektes ýchaskelerin bólý týraly shart, sondai-aq shekara tártibi týraly úkimetaralyq kelisim erekshe oryn alady. Osylaisha, biz elderimiz arasyndaǵy qurlyqtaǵy jáne teńizdegi shekaralardy zańdy túrde rásimdeýdi aiaqtadyq. Munyń saiasi máni bar, – dedi Qasym-Jomart Toqaev.
Kelissózder barysynda saýda-ekonomikalyq yntymaqtastyqtyń perspektivalaryna basa mán berildi.
– Taýar ainalymyn odan ári arttyrý úshin mol áleýetimiz bar. Energetika, kólik, logistika, aýyl sharýashylyǵy, kásiporyn jáne basqa da salalarda aitarlyqtai rezervimiz bar. Sondyqtan biz ózara saýda kólemin edáýir arttyrýǵa baǵyttalǵan sharalar toptamasyn qabyldaýǵa kelistik. Úkimetterge taýarlardyń nomenklatýrasyn keńeitý úshin eki eldiń eksporttyq áleýetin jumyldyrý tapsyryldy, – dedi Memleket basshysy.
Prezident elimizdiń metallýrgiia, mashina jasaý, munai-himiia, azyq-túlik jáne farmatsevtikalyq ónerkásip, sondai-aq aýyl sharýashylyǵy ónimderin, onyń ishinde, eń aldymen, un men bidai tasymaldaý kólemin ulǵaitýǵa ázir ekenin aitty.
Memleket basshysy barynsha tiimdi ekonomikalyq kooperatsiiany jandandyrý úshin úkimetterge Investitsiia tartý isin kótermeleý jáne qorǵaý jónindegi kelisimge qol qoiýdy jedeldetý tapsyrylǵanyn aitty. Onyń aitýynsha, gaz salasyndaǵy ózara tiimdi yntymaqtastyq jańa perspektivalarǵa jol ashady. Atap aitqanda, Qazaqstan túrikmen gazynyń importyn edáýir ulǵaitýǵa daiyn.
Qasym-Jomart Toqaev aimaqtyq yntymaqtastyq máselelerin talqylaý barysynda birqatar mańyzdy bastama kóterdi.
– Saýda-ekonomikalyq áleýetimizdi jan-jaqty júzege asyrý maqsatynda Qazaqstan jyl saiyn óńiraralyq forýmdar ótkizýdi usyndy. Mundai format óziniń tiimdiligin dáleldedi. Osyndai jumystyń nátijesinde Mańǵystaý oblysy men Balqan ýálaiatynyń shekarasynda avtokólik júgi terminalynyń shekaraaralyq saýdasynyń arnaýly aimaǵyn qurýǵa bolar edi, – dedi Prezident.
Kezdesýge qatysýshylar kólik-tranzit salasyndaǵy ózara yqpaldastyqtyń perspektivasyn talqylady.
– Bul baǵyttaǵy negizgi mindet – «Qazaqstan – Túrikmenstan – Iran» magistralin tolyq iske qosý. Tasymaldanatyn júk kólemin arttyrý úshin elderimizdegi tariftik saiasatty ońtailandyrýdyń jáne júk tasymalyna qoiylatyn talaptardy jaqsartýdyń mańyzdy ekeni atap ótildi. Kaspiidegi Aqtaý, Quryq jáne Túrikmenbashy ailaqtarynyń arasyndaǵy logistikalyq yqpaldastyq boiynsha zor múmkindik bar, – dedi Memleket basshysy.
Qasym-Jomart Toqaev Qazaqstan baǵyty boiynsha jańa avtojoldy iske qosý úshin Qarabuǵaz shyǵanaǵy arqyly ótetin kópir qurylysyna qatysty túrikmen basshysynyń bastamasyn qoldap, perspektivasy bar bul jobany birlesip júzege asyrý múmkindigin qarastyrýǵa ázir ekenin aitty.
Prezidenttiń aitýynsha, mádeni-gýmanitarlyq bailanystardy odan ári nyǵaitý – elderimiz arasyndaǵy berik ári uzaq merzimdi qatynastardyń kepili. Bul rette, Memleket basshysy eki eldiń ózara mádeni kúnderin ótkizý jáne jastar arasyndaǵy bailanystardy keńeitý mańyzdy dep sanaidy.
Kelissózder baǵdarlamasyna óńirlik jáne jahandyq kún tártibiniń máseleleri de engizildi.
– Aýǵanstandaǵy jaǵdaidy egjei-tegjeili talqylap, taǵdyr taýqymetin kóp tartqan osy eldegi turaqtylyq pen qaýipsizdikti nyǵaitý maqsatynda ózara tyǵyz yqpaldastyqty jalǵastyrý qajet ekenin aittyq, – dedi Qasym-Jomart Toqaev.
Memleket basshysy halyqaralyq aýqymdaǵy taqyryptardyń basym bóligi boiynsha eki taraptyń ustanymdary jaqyn ekenin atap ótti.
Qazaqstan Prezidenti sóziniń sońynda kelissózderdiń qorytyndylary halyqtarymyz arasyndaǵy dostyq pen tatý kórshilik qatynastardy nyǵaita túsetinine, qazaq-túrikmen seriktestigin jańa strategiialyq biikke kóterý úshin jol ashatynyna senim bildirdi.
Qasym-Jomart Toqaev Túrikmenstan Prezidentin keler jyly Qazaqstanǵa memlekettik saparmen kelýge shaqyrǵanyn aitty.
Brifingten keiin Qazaqstan Prezidentin «Bitaraplyk» ordenimen saltanatty túrde marapattaý rásimi ótti. Memleket basshysyna Joǵary nagradany Túrikmenstan Prezidenti Gýrbangýly Berdimuhamedov tabystady.
