Qasym-Jomart Toqaev pen Emomali Rahmon shaǵyn formattaǵy kezdesýden keiin eki eldiń resmi delegatsiialarynyń qatysýymen keńeitilgen quramda kelissóz ótkizdi, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Tájikstan arasyndaǵy saýda-ekonomikalyq yntymaqtastyqty nyǵaitý, onyń ishinde, ózara taýar ainalymyn ulǵaitý, investitsiia tartý, ónerkásip kooperatsiiasyn arttyrý, aýyl sharýashylyǵy, kólik-tranzit áleýetin damytý máselelerine basa mán berildi. Sondai-aq sý-energetika, áskeri-tehnikalyq jáne mádeni-gýmanitarlyq salalardaǵy yqpaldastyq jaǵdaiy talqylandy.
Qasym-Jomart Toqaev Emomali Rahmonǵa qonaqjailylyq tanytqany úshin alǵys aityp, bul óziniń Qazaqstan Prezidenti retinde Tájikstanǵa jasaǵan tuńǵysh ári pandemiia jaǵdaiyndaǵy alǵashqy resmi sapary ekenin aitty.
– Bul jaǵdai kóp dúnieden habar beredi dep oilaimyn. Shyn máninde, Tájikstan bizdiń senimdi strategiialyq seriktesimiz ári odaqtasymyz. Biz de Tájikstanmen aradaǵy yntymaqtastyqty joǵary baǵalaimyz. Sizdi, qurmetti Emomali Sháripuly, Qazaqstanda tájik halqynyń barsha jurt moiyndaǵan kóshbasshysy dep tanidy jáne qurmetteidi. Osy múmkindikti paidalana otyryp, Sizdiń aldaǵy jumystaryńyzǵa tabys tileimin, – dedi Qazaqstan Prezidenti.
Memleket basshysy eki el arasynda 80-nen astam shart pen kelisimderden turatyn mańyzdy sharttyq-quqyqtyq baza bar ekenin, onyń ishinde, 2015 jyly qol qoiylǵan Strategiialyq áriptestik týraly shartty erekshe atap ótti.
Prezident koronavirýsqa qatysty týyndaǵan barlyq qiyndyqty eńserý kezinde Qazaqstan men Tájikstan arasyndaǵy qatynastardy, atap aitqanda, ózara saýda-sattyqty jańa deńgeige kóterýge mol múmkindik bar ekenin aitty. Osy rette Memleket basshysy tájik ekonomikasyna jan-jaqty kómek kórsetýge daiyndyǵyn naqtylady.
Emomali Rahmon óz eliniń baýyrlas Qazaqstanmen strategiialyq seriktestikke qurylǵan qatynastardy joǵary baǵalaitynyn jetkizdi.
– Qazaqstan – Tájikstannyń syrtqy saýda ainalymynyń jalpy kólemi boiynsha ekinshi orynda. Biz barlyq baǵyt boiynsha eki el arasyndaǵy yntymaqtastyqty odan ári damytý úshin jumyla jumys isteýge niettimiz, – dedi Tájikstan kóshbasshysy.
Emomali Rahmon Qasym-Jomart Toqaev pen Elbasy Nursultan Nazarbaevtyń tájik-qazaq bailanystarynyń ózara tiimdi damýyna qosqan zor úlesin joǵary baǵalady.
Tájikstan Prezidenti saiasi-diplomatiialyq, saýda-ekonomikalyq, ǵylymi-tehnikalyq jáne mádeni-gýmanitarlyq, sondai-aq, qaýipsizdikti qamtamasyz etý salalaryndaǵy ekijaqty yqpaldastyqtyń dáiekti damýyna kóńili tolatynyn aitty.
Emomali Rahmon Qasym-Jomart Toqaevtyń bul sapary Nur-Sultan men Dýshanbe arasyndaǵy yntymaqtastyqtyń odan ári tereńdei túsýine jan-jaqty septigin tigizetinine senim bildirdi.
Kelissóz sońynda Qasym-Jomart Toqaev Emomali Rahmondy ózine yńǵaily ýaqytta Qazaqstanǵa memlekettik saparmen kelýge shaqyrdy.
Sonymen qatar Memleket basshylarynyń qatysýymen resmi delegatsiia músheleri tómendegi qujattarǵa qol qoidy:
QR Densaýlyq saqtaý ministrligi men TR Densaýlyq saqtaý jáne halyqty áleýmettik qoldaý ministrligi arasyndaǵy týberkýlezben kúres jónindegi yntymaqtastyq týraly kelisim;
Qazaqstan Respýblikasy Syrtqy ister ministrligi men Tájikstan Respýblikasy Syrtqy ister ministrligi arasyndaǵy 2021-2023 jyldarǵa arnalǵan yntymaqtastyq baǵdarlamasy;
QR Mádeniet jáne sport ministrligi men TR Mádeniet ministrligi arasyndaǵy mádeni yntymaqtastyq jónindegi ózara túsinistik týraly memorandým;
QR Indýstriia jáne infraqurylymdyq damý ministrligi men TR Ónerkásip jáne jańa tehnologiialar ministrligi arasyndaǵy ónerkásip salasyndaǵy yntymaqtastyq týraly shekti memorandým;
QR Tsifrlyq damý, innovatsiialar jáne aeroǵarysh ónerkásibi ministrligi Aeroǵarysh komiteti men TR Úkimeti janyndaǵy Bailanys qyzmetiniń arasyndaǵy ózara túsinistik týraly memorandým;
Qazaqstan Respýblikasy Saýda jáne integratsiia ministrligi men Tájikstan Respýblikasy Ónerkásip jáne jańa tehnologiialar ministrligi arasyndaǵy taýar ótkizý júiesin qurý jónindegi birlesken jobany júzege asyrý máseleleri jónindegi yntymaqtastyq týraly memorandým.
