Qazaqstan men Tájikstan arasyndaǵy áýe reisteri qaita ashylady, dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
Premer-Ministrdiń orynbasary Eraly Toǵjanovtyń tóraǵalyǵymen ótken Qazaqstan aýmaǵynda koronavirýstyń paida bolýy men taralýyna jol bermeý jónindegi vedomstvoaralyq komissiianyń 2 naýryzdaǵy sheshimine sáikes, Almaty-Dýshanbe-Almaty baǵytynda Qazaqstan men Tájikstan arasyndaǵy turaqty reisterdi qaita ashýǵa ruqsat etildi.
Tájikstanda Covid-19 infektsiiasynyń taralýyn boldyrmaý jónindegi indetke qarsy is-sharalardy kúsheitý jónindegi respýblikalyq shtabtyń sheshimine bailanysty bastapqy kezeńde ár taraptan aptasyna 1 reisten ǵana oryndalady.
14 naýryzdan bastap «Eir Astana» áýe kompaniiasy Almaty men Dýshanbe qalalary arasynda aptasyna 1 ret (jeksenbi kúnderi) turaqty reis oryndaýdy josparlap otyr.
Al Tájikstan jaǵynan Almaty men Dýshanbe qalalary arasynda turaqty áýe qatynasyn 18 naýryzdan «Somon Air» áýe kompaniiasy aptasyna 1 reispen (beisenbi kúnderi) qaita bastaidy dep josparlanyp otyr.
Reister sanitarlyq-epidemiologiialyq talaptardy qatań saqtai otyryp jáne áýe kompaniialarynyń saittarynda jariialanǵan kestege sáikes oryndalady.
