Astanada Qazaqstan men Tatarstannyń isker toptarynyń 200-den astam ókiliniń qatysýymen biznes-forým ótti. Oǵan 3-5 shilde kúnderi Qazaqstanda jumys saparymen bolǵan Tatarstan Prezidenti Rýstam Minnihanov qatysty.
Biznes forýmda sóz sóilegen QR Premer-Ministriniń birinshi orynbasary Asqar Mamin eki el arasyndaǵy taýar ainalymynyń áleýetin 1 milliard AQSh dollaryna jetkizý múmkindigi baryn atap ótti. Bul týraly Úkimet basshysynyń baspasóz qyzmetinen málim etti.
«Memleket basshysy Tatarstanǵa biylǵy maýsym aiyndaǵy sapary barysynda osyndai tapsyrma berdi», - deidi A. Mamin.
2017 jyly Qazaqstan men Tatarstan arasyndaǵy saýda ainalymy 700 mln AQSh dollaryna jýyqtady. Bul, 2016 jylmen salystyrǵanda 1,7 ese (425,3 mln. AQSh dollary) kóp.
Forým aiasynda munai-himiia, mashina jasaý, qorǵanys ónerkásibi, kólik jáne innovatsiia salasyndaǵy yntymaqtastyqtyń bolashaǵy talqylandy. Biznes-forým qorytyndysy boiynsha taraptar birlesken jobalardy júzege asyrýdyń Jol kartasyn jasaqtaýǵa kelisti.
Onyń syrtynda, QR Prezidenti Memlekettik basqarý akademiiasy men Qazan federaldyq ýniversiteti, Qazaqstannyń Syrtqy saýda palatasy men Tatarstan saýda-ónerkásip palatasy, «Astana Hub» IT-startap halyqaralyq tehnoparki men «It-park» joǵary tehnologiialar salasyndaǵy tehnoparki, «Semei avtoqurastyrý zaýyty» JShS men «RariTEK jóndeý-mehanikalyq zaýyty» AAQ arasynda yntymaqtastyq týraly qujattarǵa qol qoiyldy.
Tatarstan Prezidenti Astanaǵa jumys sapary barysynda «Astana» Halyqaralyq qarjy ortalyǵy men Islam qarjy uiymy Sammitine qatysty.
