Foto: Aqorda
Qazaqstan Prezidenti Qasym-Jomart Toqaev pen Slovakiia Premer-ministri Robert Fitso keńeitilgen quramda kelissóz júrgizip, eki el arasyndaǵy mańyzdy ári senimdi seriktestikti odan ári damytýǵa nietti ekenderin rastady, dep habarlaidy Ult.kz.
Qasym-Jomart Toqaev saiasi dialogtyń nyǵaiýyn, ekonomikalyq jáne gýmanitarlyq yntymaqtastyqtyń damýyn, sondai-aq kópjaqty formattaǵy tiimdi yqpaldastyqty erekshe atap ótti.
– Slovakiia Eýropa Odaǵyna múshe memleketterdiń ishinde aitarlyqtai belsendi ári qarqyndy damyp kele jatqan elderdiń biri. Bul jetistik Sizdiń Úkimet basshysy retindegi kóregen kóshbasshylyǵyńyzdy kórsetedi. Slovakiianyń aimaqtyq jáne halyqaralyq isterge qatysty aiqyn ustanymy Sizdiń syndarly jahandyq damýǵa beiil ekenińizdi dáleldeidi. Men saiasi dialogtyń beki túskenin, ekonomikalyq jáne gýmanitarlyq yntymaqtastyqtyń damýyn, sondai-aq kópjaqty formattaǵy yqpaldastyqtyń tiimdi iske asyrylýyn joǵary baǵalaimyn, – dedi Prezident.
Qasym-Jomart Toqaevtyń aitýynsha, Astana men Bratislava arasyndaǵy yntymaqtastyq berik quqyqtyq bazaǵa arqa súieidi. Ol barlyq baǵytty qamtidy. Qazaqstan Slovakiiamen kún tártibindegi ekijaqty jáne kópjaqty seriktestikti tereńdetýge nietti.
Memleket basshysy ekonomikalyq áriptestikke basa nazar aýdarý qajet dep sanaidy. Byltyr taýar ainalymy 140 million dollardy quraǵan. Qazaqstanda Slovakiianyń 30-dan astam kompaniiasy jumys isteidi jáne 22 birlesken kásiporny túrli sektorda qyzmet etip jatyr.
Qazaqstan Prezidenti yntymaqtastyqty odan ári ártaraptandyrýdyń mańyzyna toqtaldy. Memleket basshysy energetika, ónerkásip óndirisi, aýyl sharýashylyǵy, logistika, tsifrlandyrý, asa mańyzdy shikizat materialdary, bilim jáne týrizm salalarynda mol múmkindik bar dep sanaidy.
Slovakiia Premer-ministri Memleket basshysyna ózine jáne delegatsiiasyna qazaq jerinde kórsetilgen qurmet úshin alǵys aitty.
– 1944-1945 jyldary Slovakiiany azat etýge qosqan ólsheýsiz úlesterińizge shynaiy rizashylyǵymdy bildiremin. Keńes áskeri sapynda Qazaqstannyń millionǵa jýyq sarbazy qan maidanda shaiqasty. Olardyń ishinde 60 myńǵa tarta jaýynger Slovakiiany jaýdan qorǵaý úshin janyn pida etti. Sol surapyl ýaqytta Slovakiiaǵa jasaǵan jaqsylyqtaryńyzdy eshqashan umytpaimyz. Joǵary Mártebeli, Sizdiń elińizdi damytýǵa jáne Ádiletti ári Órkendegen Qazaqstandy qurýǵa baǵyttalǵan órshil bastamalaryńyzdy asqan qyzyǵýshylyqpen baqylap otyrmyz. Eýropa Odaǵyndaǵy áriptesterime tek Uiym sheńberindegi jumyspen shektelmei, álemge keńinen qarap, ózge de memleketterdiń jetistikterin zerdeleý kerek ekenin únemi aityp kelemin. Biz dúnie júzindegi seriktesterimizben belsendi yqpaldastyq ornatyp, yntymaqtastyqty nyǵaita berýimiz qajet, – dedi Robert Fitso.
Kelissóz barysynda taraptar qazaq-slovak bailanysyn damytýǵa yqpal etetin seriktestikti odan ári nyǵaitýǵa, jańa bastamalardy iske asyrýǵa beiil ekenin rastady.
