Qazaqstan men Reseidiń iri qalalary arasynda tikelei áýe reisterin damytý kerek. Bul týraly Qazaqstan men Reseidiń Óńiraralyq yntymaqtastyǵynyń XV forýmynda QR Mádeniet jáne sport ministri Arystanbek Muhamediuly málim etti, dep habarlaidy QazAqparat.
«Bizdiń basty maqsatymyz - ózara tiimdi múddelerdi alǵa jyljytýǵa kedergi bolyp turǵan máselelerdi sheshý. Ol úshin taiaý ýaqytta birqatar qadamdardy iske asyrý kerek. Birinshiden, logistikalyq dálizder taqyrybyn pysyqtaý qajet. Búginde eki eldiń iri qalalary arasynda aptasyna qos baǵytta 210 tikelei áýe reisteri júredi. Sonymen birge, shekaramen shektes aimaqtardaǵy iri oblys ortalyqtary arasynda tikelei reister joq. Mysaly, Cheliabiden Astanaǵa jetý úshin, Máskeý arqyly saparlaý kerek», - dedi ministr.
Sonymen qatar A. Muhamediuly Qazaqstan men Resei arasynda vizalyq-migratsiialyq rejimderdi úilestirý taqyrybyna toqtaldy.
Budan buryn habarlanǵandai, Qazaqstan men Reseidiń Óńiraralyq yntymaqtastyǵynyń XV forýmynda QR Mádeniet jáne sport ministri Arystanbek Muhamediuly eki eldiń týrizm salasyn damytýdyń múmkindikterin baiandady.
Sonymen qatar onda Aqtaý sammiti Kaspii teńizindegi týrizmdi damytýǵa yqpal etkendigi aityldy.
Aita keteiik, búgingi forým «Qazaqstan men Reseidegi týrizmdi damytýdyń jańa joldary men úrdisteri» taqyrybynda ótip jatyr.
