Qazaqstan men Resei shekarasyndaǵy kólik keptelisine qatysty túsinik berildi, dep habarlaidy QazAqparat.
QR Qarjy ministrligi habarlaǵandai, kólik keptelisi shekaranyń Resei jaǵynda bolǵan jáne onyń sebebi - karantin talaptarynyń engizilýi.
«30 qazan kúni Qazaqstan men Resei shekarasynda kórshi el aýmaǵyndaǵy «Býgristoe» avtomobilderdi ótkizý beketinde kólik keptelisi boldy. Qazaqstan jaǵynda keptilis bolǵan joq. Kólik keptelisi 30 qazanda Reseide engizilgen karantin talaptaryna bailanysty. Resei Federatsiiasynyń qaýlysyna sáikes 30 qazan men 7 qarasha aralyǵy jumys emes kúni bolyp bekitilgen. Osyǵan bailanysty qazaqstandyq jáne reseilik tasymaldaýshylar bizdiń elge baǵyt alǵan», - degen habar taratty ministrliktiń baspasóz qyzmeti.
Berilgen aqparatqa súiensek, shekaradaǵy «Qairaq» avtomobilderdi ótkizý beketinen Resei jaǵynan kún saiyn shamamen 600 kólik ótedi eken.
Al 30 qazan kúni shekaradan ótken kólikterdiń sany 860-qa jetken.
«30 qazan kúngi saǵat 16:00-degi jaǵdaiǵa sáikes Resei jaǵyndaǵy jaǵdai turaqtaldy. Qazirgi ýaqytta kólik keptelisi joq», - delingen habarlamada.
Odan bólek, ministrlik EAEO elderimen shekaradaǵy memlekettik kirister organdary qos (áskeri) maqsattaǵy taýarlardyń, tyiym salýlar men shekteýler engizilgen taýarlardyń, sondai-aq DSU-ny alý tizbesine engizilgen taýarlardyń ótkizilýine qujattamalyq baqylaýdyń baryn eske salady.
Atalǵan shara 5 minýttan aspaidy jáne keptilistiń týyndaýyna esh áseri joq.
