19-20 qazanda at sporty halyqaralyq federatsiiasynyń (FEI) prezidenti Ingmar De Vos Qazaqstan Respýblikasyna saparmen keldi, dep habarlaidy "Ult aqparat" At sporty federatsiiasyna silteme jasap.
Ingmar De Vos óńirde at sportyn damytý máselelerin talqylaý maqsatynda alǵash ret Ortalyq Aziia elderine keldi. Sapar barysynda De Vos myrza Qazaqstan Respýblikasynyń At sporty federatsiiasynyń prezidenti Berik Imashevpen, Respýblikanyń Ulttyq Olimpiada komitetiniń basshylyǵymen, Ulttyq paralimpiadalyq komitettiń basshylyǵymen kezdesýler ótkizdi. Sondai-aq, De Vos myrza elimizdiń at sporty infraqurylymymen tanysyp, Almaty men Almaty oblysynyń birqatar At-sporttyq klýbtaryn aralady.
Sonymen qatar, Halyqaralyq at sporty federatsiiasynyń prezidenti Qazaqstan chempionatynyń jeńimpazdary men júldegerlerin marapattaý rásimine qatysty.
Sondai-aq, FEI delegatsiiasynyń quramynda Resei at sporty federatsiiasynyń delegatsiiasy boldy. Ony Resei federatsiiasynyń prezidenti Marina Sechina bastap keldi. Qazaqstan men Resei at sporty federatsiialary arasynda óńirde at sportyn damytý jáne qoldaý maqsatynda yntymaqtastyq týraly memorandýmǵa qol qoiyldy.
Eske sala ketsek, Qazaqstanda tuńǵysh at sporty mektebi 1956 jyly ashyldy. Qazaqstandyq shabandozdar birneshe ret Aziia chempionattarynyń, álem kýbogy kezeńderiniń jáne At sporty boiynsha QR aýmaǵynda jáne odan tys jerlerde halyqaralyq týrnirlerdiń júldegerleri atandy.
