Qazaqstan men Resei taýar ainalymy kólemin 20 mlrd AQSh dollaryna jetkizý kórsetkishine jaqyndady. Bul týraly Qazaqstan men Reseidiń Óńiraralyq yntymaqtastyǵynyń XV forýmynda Elbasy Nursultan Nazarbaev málim etti, dep habarlaidy QazAqparat.
«Biyldyń 8 aiynda taýar ainalymy 11 mlrd AQSh dollarynan asty, al sońyna qarai onyń deńgeii 18 mlrd dollarǵa jetedi dep kútilýde. Osy oraida 20 mlrd dollarǵa jetkizý maqsatyn eńserip qaldyq. Ózara saýdada óńdelgen taýarlar úlesi artyp kele jatqany qýantady, bul turǵydaǵy kórsetkish 82 paiyzǵa jetti. Resei Qazaqstan eksporty úshin iri naryq bolyp otyr», - dedi Elbasy.
Reseilik kapitaldyń qatysýymen Qazaqstanda 9 myńnan astam kásiporyn óziniń qyzmetin tabysty túrde júzege asyrýda. Olar ekonomikanyń barlyq salasyna úles qosýda.
«Búginde 10 mlrd AQSh dollaryna biz 60-tan astam investitsiialyq iri jobany júzege asyrdyq. Iske asyrý kezeńinde taǵy da 57 joba tur, olardyń quny 6 mlrd dollarǵa baǵalandy», - dedi N. Nazarbaev.
Olar munai-gaz, taý-ken metallýrgiialyq keshendi, agroónerkásiptik salada qamtylǵan.
Budan buryn habarlanǵandai, QR Prezidenti Qazaqstan men Reseidiń Óńiraralyq yntymaqtastyǵynyń forýmy óziniń tiimdiligin dáleldegenin atap ótti.
