Seisenbi kúni Briýsselde Eýrokomissiia ǵimaratynda Qazaqstan men Ózbekstannyń joǵary oqý oryndarynda aýǵandyq qyzdardy oqytý baǵdarlamasyn iske qosý rásimi ótti, dep habarlaidy QazAqparat.
Eýropalyq Odaq shilde aiynda BUU-men birlesip, 50 aýǵandyq qyzǵa Qazaqstan men Ózbekstan ýniversitetterinde bilim alýǵa múmkindik beretin pilottyq jobaǵa 2 mln eýro bóldi.
Is-sharaǵa Aýǵanstannan, Qazaqstan men Ózbekstannan kelgen diplomattar, Eýropalyq komissiia men BUU qyzmetkerleri, sarapshylar men jýrnalister qatysty. Qazaqstan tarapynan Syrtqy ister ministriniń orynbasary Roman Vasilenko boldy.
«Búgin biregei baǵdarlama tanystyryldy. Alǵash ret mundai format Eýropalyq Odaqqa 2 jyl buryn usynyldy. Ony osy uiymnyń ózi qoldaǵan», - dedi qazaqstandyq diplomat jýrnalisterge.
«Bul baǵdarlamanyń ideiasy 2010 jyly Qazaqstan Respýblikasynyń Tuńǵysh Prezidenti Nursultan Nazarbaevtyń bastamasymen qolǵa alynǵan 50 mln dollar qarajatqa bir myń aýǵandyq jasty oqýǵa daiarlaý boiynsha baǵdarlama aiaqtalǵanda dúniege kelgen bolatyn», - dep atap ótti ol.
«Osy baǵdarlamamen bilim alǵan aýǵandyqtar 100 paiyz óz eline qaityp oralǵanyn jáne olar birden jumys taýyp ketkenin (75% qaityp oralǵannan keiin birden jumyspen qamtylǵan) kórgen eýropalyq tarap bizdiń tájiribemizge qyzyǵýshylyq tanytyp, osy ideiany qoldady», - dedi R.Vasilenko.
Óz kezeginde Halyqaralyq yntymaqtastyq jáne Eýropalyq komissiiany damytý jónindegi bas direktorattyń Ortalyq Aziia, Taiaý Shyǵys jáne Ońtústik Aziia boiynsha basqarmasynyń basshysy Rafael Iodiche Aýǵanstandy turaqtandyrý boiynsha Qazaqstannyń áleýetin joǵary baǵalady.
Osy ýaqytqa deiin bizdiń elimiz Aýǵanstanǵa 80 mln dollardan astam kómek kórsetti, onyń ishinde meditsinalyq jáne bilim berý ortalyqtaryn salýǵa, sondai-aq joldar men kópirlerdi qaita jańartýǵa 3,5 mln. bóldi.
R. Iodiche atap ótkendei, eger Eýropalyq Odaq, Qazaqstan jáne Ózbekstan arasyndaǵy úshjaqty yntymaqtastyq baǵdarlamasy óziniń tiimdiligin dáleldese, onda Ortalyq Aziia elderiniń joǵary oqý oryndarynda EO esebinen oqityn aýǵandyq qyzdardyń sany ulǵaiady.
Aýǵandyq stýdentter Qazaqstanda Satbayev University, QBTÝ, Qazaq ulttyq agrarlyq ýniversiteti jáne Almaty menedjment ýniversitetinde aǵylshyn tilinde bilim alady.
Aita ketý kerek, BUU Damý Baǵdarlamasynyń baiandamasyna sáikes, barlyq eresek aýǵan áielderiniń 11 paiyzy orta bilim alyp, sonyń ishinen tek 19,5%-y jumysqa ornalasqan, al erlerdiń 37 %-y orta bilim alǵan bolsa, onyń 87%-y jumysqa turǵan.
2016-2017 jyldary Aýǵanstan halqynyń jartysynan astamy kedeishilikte kún keship jatqan bolatyn.
