Ózbekstanmen shekarada «Ortalyq Aziia» halyqaralyq saýda-ekonomikalyq yntymaqtastyq ortalyǵynyń qurylysy bastalady. Bul jaiynda QR Saýda jáne integratsiia ministri Baqyt Sultanov Facebook paraqshasynda jazdy, dep habarlaidy "Ult aqparat".
«Jaqyn arada biz ońtústik baǵytynda aýqymdy saýda jobasy – Ózbekstanmen shekarada «Ortalyq Aziia» halyqaralyq saýda-ekonomikalyq yntymaqtastyq ortalyǵynyń (HSEYO) qurylysyn iske asyrýǵa kirisemiz. Bul týraly budan eki jyl buryn Memleket basshylary deńgeiinde ýaǵdalastyqqa kelgen bolatynbyz. Al naqty sharalardy biz áriptesimiz – Ózbekstan Respýblikasynyń Investitsiialar jáne syrtqy saýda ministri Sardor Ýmýrzakovpen talqyladyq. Naýryzdaǵy áielder merekesine qaramastan biz onymen keleshek HSEYO orny – «Jibek Joly – Gisht Kýprik» shekara beketinde kezdestik», - dep atap ótti Baqyt Sultanov.
Onyń aitýynsha, HSEYO – Ortalyq Aziia elderimen saýda yntymaqtastyǵymyzdyń mańyzdy elementi. Munda tek kóterme-bólshek saýda nysandary men olardyń infraqurylymy ǵana salynyp qoimai, sondai-aq mańyzdy kólik-logistikalyq ortalyq ta qurylady.
«Álemdegi ekonomikalyq turaqsyzdyq, baǵanyń tómendeýi, koronavirýstyń halyqaralyq saýdaǵa qateri, týrizmniń básendeýi jaǵdaiynda kórshilermen saýdany qarqyndatý- daǵdarys qubylystaryn birge jeńýdiń eń ońtaily tásili. Búginde Ortalyq Aziia - 71 mln adamnan astam halqy bar serpindi óńir. OA-da ishki aimaqtyq eńbek bólinisi úshin úlken múmkindikter bar, óńir elderi bir-birine tiimdi ótkizý naryǵy sanalady. Jáne bizdiń elderimizdiń qazirdiń ózinde ózara belsendi yntymaqtastyq jasaýynyń da mańyzy zor», - dedi ministr.
B.Sultanov dereginshe, 2019 jyldyń qorytyndysy boiynsha Qazaqstannyń Ortalyq Aziia elderimen taýar ainalymy 5,1 mlrd AQSh dollaryn qurady. Bul rette Ózbekstan óńirdegi iri saýda áriptesi sanalady. Qazaqstannyń óńirmen ózara saýdasynyń 60 paiyzdan astamy atalǵan eldiń úlesine tiesili. Ózara saýdanyń ósý qarqyny 2017 jyldan bastap jalǵasýda jáne orta eseppen 30,7 paiyzdy quraidy. Ózara saýda ótken jyly tórt milliardtyq shekten asyp, bes milliardqa jaqyndap qaldy.
«Sondyqtan HSEYO qurý - elderimizdiń ekonomikalyq kooperatsiiasyn odan ári kúsheitýge áser etedi jáne «Ońtústik-Soltústik, Soltústik-Ońtústik» dáliziniń mańyzdy jobalarynyń biri bolyp tabylady. Ol óńirden basqa elderge baǵyttalǵan úlken taýar qubyrynyń bir bóligi bolmaq. Ózderińiz biletindei, qazirgi ýaqytta Qazaqstanda kóterme-taratý ortalyqtary men agro-logistikalyq ortalyqtar jelisin qamtityn taýar ótkizý júiesin qurý jumysy júrgizilýde. Osyǵan uqsas infraqurylym kórshi Ózbekstan men Qyrǵyzstanda da qurylýda. HSEYO jobasyn iske asyrý Qazaqstan úshin ońtústikke qaqpa ashyp qana qoimai, osy memleketterdiń úshinshi elderge, birinshi kezekte Reseige, Eýropa men Qytaiǵa taýarlardy birlesip eksporttaýlary úshin biryńǵai tetik qurýǵa múmkindik beredi. Óitkeni, HSEYO-ǵa óte jaqyn mańda 2 iri aglomeratsiia – Shymkent pen Tashkent ornalasqan. Tikelei jaqyn jerde iri jáne damyǵan infraqurylymdyq toraptar – Saryaǵash temir jol stansalary, «Jibek Joly» halyqaralyq ótkizý beketi, Batys Eýropa – Batys Qytai avtojoly da bar», - dep atap ótedi Baqyt Sultanov.
