Memleket basshysy Ózbekstan Prezidentimen Shavkat Mirziioevpen telefon arqyly sóilesti, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidenti Qasym-Jomart Toqaev pen Ózbekstan Prezidenti Shavkat Mirziioev Sardoba sý qoimasy bógetiniń buzylý saldarynan Qazaqstan men Ózbekstannyń sý basqan aimaqtaryndaǵy jaǵdaidy turaqtandyrýǵa qatysty eki el úkimetteriniń atqaryp jatqan jumystaryn egjei-tegjeili talqylady.
Memleketter basshylary halyqty evakýatsiialaý jáne áleýmettik qoldaý, injenerlik jáne kólik infraqurylymyn qaita qalpyna keltirý sekildi shuǵyl atqarylýy tiis birqatar mindetterdi sheshý barysyndaǵy taraptardyń tyǵyz ári úilesimdi jumysyna oń baǵa berdi.
Ózbekstan basshysy baýyrlas halyqtar arasyndaǵy qatynas dostyq jáne tatý kórshilik dástúrge negizdelgenin aityp, kez-kelgen qiyndyqty birlesip eńserýge bolatynyn atap ótti. Shavkat Mirziioev Ózbekstan tarapynyń jan-jaqty qoldaý kórsetetinin, onyń ishinde, erkin aqparat almasyp, bógetti qaita qalpyna keltirý kezinde Qazaqstannyń múddesi men halyqaralyq quqyq qaǵidattaryn eskerip, ashyq jumys júrgizýge daiyn ekenin jetkizdi.
Qasym-Jomart Toqaev Shavkat Mirziioevke osyndai qysyltaiań shaqta Ózbekstannyń kórsetken qoldaýy men kómegi úshin rizashylyǵyn bildirdi.
– Biz bir ózenniń boiynda otyrmyz. Ózara senim men ashyqtyq negizinde ǵana sý resýrstaryn ádil, tiimdi paidalanýǵa qol jetkizemiz jáne transshekaralyq sipattaǵy qaýip pen syn-qaterlerdiń aldyn alýǵa múmkindigimiz bolady, – dedi Qazaqstan Prezidenti.
Taraptar transshekaralyq ózenderdiń resýrstaryn birlesip basqarý jáne paidalaný tetikterin odan ári jetildirý týraly kelisimge keldi. Osy oraida eki el úkimetterine turaqty ári joǵary deńgeide jumys isteitin arnaiy top qurý máselesin oilastyrý júkteldi.
Áńgime sońynda taraptar birin-biri Uly Otan soǵysyndaǵy Jeńistiń 75 jyldyǵymen quttyqtady.
Qasym-Jomart Toqaev pen Shavkat Mirziioev bul merekege erekshe mán berip, qurmetpen qaraý kerek ekenin atap ótip, barlyq ardagerler men tyl eńbekkerlerine shyn júrekten zor densaýlyq pen uzaq ǵumyr, al, baýyrlas Qazaqstan men Ózbekstan halyqtaryna amandyq pen órkendeý tiledi.
Telefon arqyly sóilesýge ózbek tarapy bastamashy boldy.
