QR Premer-Ministriniń orynbasary – Syrtqy ister ministri Muhtar Tileýberdi Majarstan Premer-ministriniń orynbasary, Qarjy ministri Mihai Vargamen kezdesti, dep habarlaidy QazAqparat.
«Majarstan Premer-ministriniń orynbasary, Qarjy ministri Mihai Varganyń Qazaqstanǵa keshe bastalǵan sapary búgin jemisti jalǵasýda.
Búgin biz memleketaralyq ózara is-qimyldyń turaqty jumys isteitin institýty bolyp tabylatyn Qazaqstan – Majarstan Strategiialyq keńesiniń Besinshi otyrysyn ótkizdik.Majarstan Ortalyq jáne Shyǵys Eýropa óńirindegi bizdiń birden-bir senimdi strategiialyq áriptesimiz, dostas ári tarihy tamyrlas memleket. Búgingi tańda eki memleket arasynda sheshimin tappaǵan eshqandai másele joq», - dedi M. Tileýberdi QR Syrtqy ister ministrliginde ótken kezdesýde.
Ministr qos memleket arasyndaǵy saiasi dialog joǵary deńgeide ekenin atap ótti.
Qazaqstan men Majarstan bir-biriniń halyqaralyq arenadaǵy bastamalary men kúsh-jigerin qoldap keledi.
«Bul óz kezeginde ekijaqty jáne kópjaqty ózara is-qimyldy odan ári damytýǵa qolaily jaǵdai týdyrady. M. Varga myrzamen Qazaqstan men Majarstan arasyndaǵy saiasi, saýda-ekonomikalyq, investitsiialyq jáne mádeni-gýmanitarlyq salalardaǵy ózara is-qimyldyń búgingi ahýaly men odan ári damýynyń perspektivalaryn talqyladyq. Biz ózara tiimdi yntymaqtastyqty, eń aldymen ekonomikalyq jáne investitsiialyq ózara is-qimyldy tereńdetý jáne ekijaqty saýdany ulǵaitý arqyly ony odan ári nyǵaitýdyń mańyzdylyǵyn atap óttik. Aýyl sharýashylyǵy, energetika, «jasyl ekonomika», densaýlyq saqtaý, bilim jáne mádeniet salalaryndaǵy yntymaqtastyqqa erekshe nazar aýdaryldy», - dedi Muhtar Tileýberdi.
