Ekologiia, geologiia jáne tabiǵi resýrstar vitse-ministri Serik Qojaniiazov Qazaqstan men Qytai arasyndaǵy transshekaralyq ózender máselesi boiynsha júrgizilip jatqan kelissózderdiń nátijesi týraly málim etti, dep habarlaidy QazAqparat.
Ortalyq kommýnikatsiialar qyzmetinde ministrlik ókiline transshekaralyq ózenderdiń máselesi týraly birneshe saýal qoiyldy. Sol saýaldarǵa jaýap bergen Serik Jumaniiazov Qytaidyń atalmysh máselede ózge eshbir eldermen kelissóz ústeline otyrmaǵanan eske saldy.
«Qytai óz tarihynda osy kúnge deiin transshekaralyq sý obektileri bar 18 eldiń eshqaisysymen sý bólý jóninde birde-bir halyqaralyq shart jasasqan joq. Resei Federatsiiasy, Úndistan, Pákistan, Aýǵanstan, Qyrǵyzstan, Tájikstan, Vetnam, Bangaldesh, Nepal, Soltústik Koreia, Kambodja siiaqty elderdiń bir de bireýimen halyqaralyq kelisimge otyrmaǵan. 2013 jylǵy qyrkúiekte QHR tóraǵasy Si Tszinpinniń Qazaqstanǵa memlekettik sapary barysynda Qazaqstan men Qytai basshylary deńgeiinde qol jetkizilgen ýaǵdalastyqtardyń arqasynda 2015 jyldan bastap transshekaralyq ózender sýyn bólý týraly kelisim jobasyn ázirleý men kelisýdi bastaý týraly sheshim qabyldanǵan bolatyn», - dedi vitse-ministr.
Osy kelisim negizinde eki jaqtyń mamandarynyń basyn qosqan Transshekaralyq ózenderdi paidalaný jáne qorǵaý jónindegi Qazaqstan-Qytai birlesken komissiiasy qurylǵan bolatyn. Vedomstvo ókiliniń aitýynsha, búginde osy birlesken komissiianyń 17 otyrysy ótipti.
«Transshekaralyq ózender sýyn bólý týraly kelisim jobasyn ázirleý jáne kelisý jumystary qazirgi pandemiiaǵa qaramastan jalǵasyp jatyr. Kelisimdi maquldaý óte kúrdeli jumys ekenin aitqym keledi. Ǵylymi zertteýler júrgizýdi qajet etedi. Bul jumysqa Geografiia jáne sý qaýipsizdigi institýtynyń joǵary bilikti mamandary tartylyp otyr. Tartylǵan sarapshylardyń ishinde Qazaq KSR-niń burynǵy Sý sharýashylyǵy ministri, Qazaqstannyń Sý resýrstary jónindegi memlekettik komitetiniń alǵashqy tóraǵasy Nariman Qypshaqbaev, 2002-2009 jyldary Sý resýrstary komiteti tóraǵasynyń orynbasary bolǵan Ámirhan Kenshinov, 40 jyldyń eńbek ótili bar sý mamany Aleksandr Kalashnikov, geografiia jáne sý qaýipsizdigi institýty direktorynyń orynbasary Saiat Álimqulov siiaqty bilikti mamandar bar. Osy sarapshylardyń joǵary biliktiligi bizge aitarlyqtai nátijelerge jetýge múmkindik berdi. Naqty aitsaq, Transshekaralyq ózender sýyn bólý týraly kelisim jobasy mátininiń 25 paiyzy maquldandy», - dedi Serik Qojaniiazov.
