Úkimet basshysynyń orynbasary Eraly Toǵjanov Qazaqstan men Qytai arasyndaǵy saýda bailanysy qalai júrip jatqanyn aitty, dep habarlaidy QazAqparat.
«Koronavirýstyń ekonomikaǵa tigizetin yqpaly jaily Úkimet basshysy búgin aityp ótti. Ekonomikaǵa jaýapty adamdardyń bári bul máselemen ainalysyp jatyr. Shekteýge qatysty aitarym, álbette ekonomika máselesi óte mańyzdy. Qazirdiń ózinde Qytai ekonomikasy 1 paiyzǵa quldyrady degen málimet bar. Álemdik ekonomikadaǵy Qytaidyń úlesi 24 paiyz ekenin eskersek, bul ahýal kóptegen elge, onyń ishinde Qazaqstanǵa áser etpei qoimaidy. Áitse de osynshalyqty ekonomikalyq shyǵyndy eskergenimizben, búgingi tańda azamattardyń qaýipsizdigin birinshi orynǵa qoiamyz», - dedi Eraly Toǵjanov Úkimettiń baspasóz ortalyǵyndaǵy brifing barysynda.
Úkimet basshysynyń orynbasary dál qazir Qazaqstan men Qytai arasynda temirjol arqyly bailanys baryn málim etti.
«Máselen, Dostyq beketinde mashiniske deiin tiisti sharalardy qabyldap jatyrmyz. Sol sebepti barlyq aldyn alý sharalary memlekettik shekaradan bastap júrgizilip jatqanyn aitqym keledi. Júk tasymaly jaǵynan naqty sharalar qabyldanǵan. Máselen ótken táýlikte ǵana tek 10 avtokólik qana ótti. Iaǵni, biz ary-beri qozǵalysty barynsha qysqartyp jatyrmyz. Álbette bul shekteýler bizdiń eldiń ekonomikasyna, saýdasyna áser etip jatyr. Áitse de túsinistik bolý kerek», - dedi ol.
Óz kezeginde Indýstriia jáne infraqurylymdyq damý vitse-ministri Berik Qamaliev ary-beri qatynap júrgen kólikterge qatysty mán-jaidy túsindirdi.
«Kóbinese Qytaiǵa biz jaqtan avtokólik quraldary kiredi. Máselen aqpan aiynda 8-20 kólikten kirip júrdi. Olar shekaradan ary ótkennen keiin bar-joǵy 3 shaqyrym júredi de kedendik aýmaqtaǵy qoimalarǵa barady. Olar QHR politseilerimen birge júrip, júkti alyp, qaita elge qaitady. Ol jaqtan elge qaitqan azamattarymyzdyń bári birden dárigerlerdiń baqylaýyna alynady. Al Qytai jaqtan sońǵy bir kólik 17 aqpanda ǵana kelgen. Osydan keiin QHR tarapynan bizge avtokólikter kirgen joq», - dedi ol.
