QR Aqparat jáne qoǵamdyq damý ministrligi men Koreialyq mýltiplikatsiialyq filmderdi tanytý jónindegi agenttik arasynda memorandýmǵa qol qoiyldy.
Bul týraly QazAqparat QR Aqparat jáne qoǵamdyq damý ministrliginiń Telegram kanalyna silteme jasap habarlaidy.
Memorandým sheńberinde taraptar arasynda tájiribe almasý, televiziialyq jobalardy iske asyrý úshin qolaily jaǵdailar jasaý, animatsiialyq mýltfilmder shyǵarý boiynsha dárister, master-klastar men treningter ótkizý kózdelgen.
Aita ketý kerek, agenttik 1998 jyly qurylǵan jáne «Erekshe bilim berý qajettilikteri bar balalar men jasóspirimderge arnalǵan animatsiia akademiiasy» jobasyn júzege asyrýda.
Memorandýmnyń maqsaty – bilim alýdaǵy teńsizdikti qysqartý, áleýmettik beiimdelýge járdemdesý, sondai-aq jumys oryndaryn qurý jáne múmkindigi shekteýli azamattardy jumysqa ornalastyrý bolyp tabylady.
2021 jylǵy 12 naýryzda Qazaqstan Táýelsizdiginiń 30 jyldyǵyna orai QR Aqparat jáne qoǵamdyq damý ministrliginiń bastamasymen «Qazaqstan RTRK» AQ «Balapan» telearnasynyń janynan erekshe bilim berý qajettilikteri bar balalarǵa arnalǵan áleýmettik animatsiialyq ashylǵan bolatyn.
Mundai joba Ortalyq Aziiada alǵash ret júzege asyrylýda, onda Qazaqstan, Japoniia jáne Ońtústik Koreianyń úzdik mýltiplikatorlary mektep qatysýshylaryn oqytatyn bolady.
Mektep erekshe bilim berý qajettilikteri bar balalarǵa olardyń áleýmettik beiimdelýine yqpal etetin jańa bilim men daǵdylardy alýǵa múmkindik beredi.
Aita keteiik, joba talantty túlekterdiń bolashaqta jumysqa ornalasý múmkindigin qarastyrady.
«Balapan» telearnasynyń janynan qurylǵan animatsiialyq mekteptiń ereksheligi, oqýdan keiin balalar muǵalimdermen bailanystaryn nyǵaityp, qajet jaǵdaida keńes ala alady.
Búgingi tańda Qazaqstanda animatsiialyq dizain salasy qarqyndy damyp keledi. Sonymen qatar, mundai jumys fizikalyq damý erekshelikteri bar adamdar úshin yńǵaily bolýy mýmkin.
