Frantsiianyń ekonomika jáne qarjy ministri Briýno Le Merdiń Qazaqstanǵa sapary aiasynda «Qazaqstan temir joly» UK» AQ men «Alstom» kompaniiasy memorandým bekitti, dep habarlaidy QazAqparat.
Qujatqa «QTJ» UK» AQ tóraǵasynyń birinshi orynbasary Qanat Álmaǵambetov pen «Alstom» kompaniiasy Taiaý Shyǵys, Afrika jáne Ortalyq Aziia aimaǵynyń aǵa vitse-prezidenti Dide Pfleger qol qoidy.
Qos tarap temirjol dabyly, buǵattaý jáne ortalyqtandyrý tsifrlyq tehnologiialaryn damytý salasynda yntymaqtastyq ornatýǵa nietti.
«Alstom» men QTJ arasyndaǵy memorandýmnyń negizgi maqsaty – temirjol kóligindegi tsifrlandyrý men avtomattandyrý protsesterindegi yntymaqtastyq bolyp otyr. Ondaǵy eń alǵashqy qadam – iri stantsiialardy avtomattandyrý nemese dabyl júiesin ornatý bolmaq. Ári qarai temirjol kólikterindegi tsifrlandyrý boiynsha jumys isteimiz. Ózderińiz bilesizder, bizdiń kompaniianyń birneshe jobasy «Tsifrlyq Qazaqstan» memlekettik baǵdarlamasyna engen», - dedi «QTJ» UK» AQ bas injeneri Batyr Kotyrev astanadaǵy «Elektrovoz qurastyrý zaýytynda» tilshilerge bergen suhbatynda.
Onyń aitýynsha, qazirgi temirjol qurylǵylary 35-40 jyldan beri qoldanylyp keledi.
«Árine, olar qozǵalys qaýipsizdigi talaptaryna sai. Biraq, búkil álem úzdiksiz damyp keledi, zamanaýi júieler paida boldy. Sońǵy birneshe jylda 2,5 myń shaqyrym jańa temirjol saldyq, onda tsifrlyq temirjol talaptaryna sai zamanaýi júieler qoldanylady. Qazir biz «Alstom» kompaniiasynyń dabyl qaǵý júiesin qoldaný múmkindigin qarastyryp otyrmyz», - dedi ol.
Aita keteiik, Frantsiianyń ekonomika jáne qarjy ministri Briýno Le Mer elordaǵa resmi saparmen keldi.
Búgin frantsiialyq ministr QR Prezidenti Qasym-Jomart Toqaevpen, QR Premer-Ministri Asqar Maminmen jáne QR Premer-Ministriniń orynbasary Jeńis Qasymbekpen kezdesedi.
