Qazaqstan jáne Frantsiia otyn-energetika keshenindegi yntymaqtastyq perspektivasyn talqylady, dep habarlaidy "Ult aqparat" Energetika ministrligine silteme jasap.
QR Energetika ministri Nurlan Noǵaev Eýropa jáne Frantsýz Respýblikasynyń Syrtqy ister ministri janyndaǵy Syrtqy saýda jáne ekonomikalyq tartymdylyq máselesi boiynsha ministr - delegat Frank Riestermen, sondai-aq MEDEF International Frantsiia kásiporny qozǵalysynyń ókili Iv-Lýi Darrikarermen kezdesý ótkizdi.
Kezdesý barysynda taraptar otyn-energetika keshenindegi aǵymdaǵy birlesken aýqymdy jobalardyń iske asyrylýyn talqylap, jańartylatyn energiia kózderi, munaidy óndirý jáne investitsiialar salasyndaǵy eki jaqty yntymaqtastyqty keńeitý perspektivalaryn qarastyrdy.
QR Energetika ministri Qazaqstanda aýqymdy energetikalyq jobalardy iske asyryp otyrǵan «Total», «Orano», «Air Liquide» jáne t.b. iri frantsýz kompaniialarynyń tiimdi qyzmetin atap ótti.
Budan basqa, MEDEF International frantsýz-qazaqstandyq iskerlik keńesiniń teń tóraǵasynyń basshylyǵymen «Total», «Orano», «Alstom», «Air Liquide», «Idemia», «Lazard Freres», «EDF» frantsýz kompaniialarynyń ókilderi atom energetikasy, AMÓZ jáne PMÓZ úshin sýtegi jáne azot ónerkásiptik gazdaryn óndirý jáne energetika men gidroresýrstar salasyndaǵy injenerlik qyzmetterge qatysty birlesken jobalardy iske asyrý máselelerin kóterdi.
Qazaqstandaǵy «Total» kompaniiasynyń bas direktory Alem Friga-Noi jáne «Total EREN» kompaniiasynyń Ortalyq Aziia jónindegi vitse-prezidenti Terri Plezan «Total» kompaniiasynyń Qazaqstanmen kópjyldyq yntymaqtastyǵynyń, atap aitqanda kompaniianyń NCOC konsortsiýmynda qatysýy arqyly oń qorytyndylary týraly aitty, sondai-aq jańartylatyn energiia kózderi salasyndaǵy jańa jobany iske asyrý boiynsha jospardy qozǵady.
2018 jyldan bastap «Total EREN» kompaniiasy kún energetikasy salasyndaǵy eki jobany: Qyzylorda oblysyndaǵy «Nomad» (28 MVt) jobasyn jáne Jambyl oblysyndaǵy M-KAT (100 MVt) jobasyn sátti iske asyrdy.
Kezdesýdiń sońynda taraptar otyn-energetika kesheni salasyndaǵy Qazaqstan jáne Frantsiia arasyndaǵy ózara tiimdi yntymaqtastyqty jalǵastyrý jóninde sheshim qabyldady.
