Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi Eýropalyq Odaqtyń Ortalyq Aziia boiynsha arnaiy ókili Teri Hakalamen kezdesti, dep habarlaidy QazAqparat.
«Bul - meniń arnaiy ókil retindegi alǵashqy resmi saparym. Osyǵan deiin diplomat retinde Qazaqstanda bolǵan edim. Meniń osy jolǵy saparym eki kúnge jalǵasty. Keshe Qazaqstan Prezidentimen kezdestim. Sonymen qatar, Senatta da kezdesýler ótti», - dedi Teri Hakala QR Syrtqy ister ministrimen ótken pikiralmasýdan keiin tilshilerdiń suraqtaryna jaýap bere otyryp.
Onyń aitýynsha, aldaǵy ýaqytta Úkimet múshelerimen, tilshilermen, sondai-aq EO diplomatiialyq korpýsynyń ókilderimen kezdesý ótedi.
Teri Hakala Qazaqstan men EO-nyń qarym-qatynasy óte qarqyndy ekenin aita kele, Keńeitilgen áriptestik jáne yntymaqtastyq jónindegi kelisim bekitilgenin eske saldy.
«Qarym-qatynas salasynda koronavirýs birshama kedergi keltirip otyr. Alaida tiisti qadamdardy iske asyryp kelemiz. Bizde óte jaqsy ózara dialog ornaǵan, osy oraida kóptegen taqyrypty emin-erkin talqylap otyrmyz. Jalpy, ashyq dialog bar», - dedi ol.
Budan bólek ol Aýǵanstandaǵy jaǵdaiǵa qatysty pikir bildirdi.
«Qazirgi ýaqytta Aýǵanstannan qyzmetkerlerimizdi evakýatsiialaýmen ainalysyp jatyrmyz. Bul óz kezeginde uzaq protsess desek bolady. Ázirge, ondaǵy jaǵdaiǵa naqty baǵa berý erterek. EO ol jerde gýmanitarlyq kómek jáne adam quqyqtary týraly halyqaralyq zańnama saqtalyp, osyǵan deiin Aýǵanstan halyqaralyq deńgeide ózine alǵan mindettemeler oryndalady degen úmitte. Bul turǵyda ondaǵy jaǵdai turaqty bolyp, saiasi sheshim jasalǵany óte mańyzdy», - dedi Teri Hakala.
