Qazaqstan men Armeniia azamattyq qorǵanys pen tótenshe jaǵdai salasynda yntymaqtastyq ornatty, dep habarlaidy QazAqparat.
QR Ishki ister ministri Erlan Turǵymbaev Májilistiń jalpy otyrysynda «Qazaqstan men Armeniia Úkimetteri arasyndaǵy azamattyq qorǵanys, tótenshe jaǵdailardyń aldyn alý men olardy joiýdaǵy yntymaqtastyq kelisimin ratifikatsiialaý týraly» zań jobasyn tanystyrdy.
Ministrdiń aitýynsha, bul kelisim taraptardyń biriniń aýmaǵynda tótenshe jaǵdai paida bolǵanda kómek kórsetý boiynsha birlesken is-qimyldardy uiymdastyrady.
«Kelisimdi ratifikatsiialaý eń aldymen tótenshe jaǵdaidy boljaý salasynda tájiribe almasýǵa, qaýip tóngen jáne týyndaǵan jaǵdaida halyqty daiyndaýǵa septigin tigizedi. Ekinshiden, taraptardyń oqý oryndarynda azamattyq qorǵaý salasynda mamandardy oqytýǵa, úshinshi, taraptar aýmaǵynda bolǵan tótenshe jaǵdailardy joiýda kómek kórsetýge múmkindik beredi.
QR Zańnamasy sheńberinde kelisimde kómek kórsetý men jedel áreket etý, qutqarý bólimsheleriniń shekarany jeńildetip kesip ótý jáne taraptar aýmaǵynda bolý sharttary bar. Tótenshe jaǵdaidy joiýda qutqarý quraldaryn alyp kirý máselesi rettelgen.
Buǵan deiin mundai kelisim Reseimen, Belarýs, Qyrǵyzstan, Ázerbaijan, Tájikstan, Ýkraina, Grýziia memleketterimen jasalǵan. Barlyǵy 17 ekijaqty, 13 kópjaqty kelisimder bar.
«Kelisim sheńberinde armian tarabymen seismikalyq qaýipsizdikti, onyń ishinde jedel habarlaý men halyqty evakýatsiialaýdy arttyrý jóninde tájiribe almasý qarastyrylǵan. Máselen, 1988 jyly Spitak qalasynda jer silkingen soń, Armeniia Respýblikasy ózderiniń zań júiesine birqatar ózgeris engizdi. Zań jobasynyń keri áseri joq jáne qosymsha qarjylai shyǵyndy talap etpeidi» - dedi Erlan Turǵymbaev.
Talqylaýǵa qatysqan 104 depýtat atalǵan zań jobasyn maquldady jáne qaýly qabyldady.
