QR Syrtqy ister ministriniń orynbasary Aqan Rahmetýllin men AQSh Memlekettik hatshysynyń kómekshisi Donald Lýdyń tóraǵalyǵymen Qazaqstan men AQSh arasyndaǵy Keńeitilgen strategiialyq áriptestik jónindegi komissiia otyrysy ótti, dep habarlaidy QazAqparat.
Otyrystyń negizgi maqsaty – ótken jartyjyldyqtaǵy birlesken jumysty qorytyndylaý jáne eki el arasyndaǵy strategiialyq áriptestikti odan ári keńeitý perspektivalaryn aiqyndaý boldy.
«Bul bizdiń qarym-qatynasymyzdaǵy mańyzdy kezeń. Sharanyń kún tártibi jahandyq, óńirlik qaýipsizdik salasyndaǵy ózara is-qimyldy, quqyq qorǵaý salasyndaǵy yntymaqtastyqty, klimattyń ózgerýin, bilim almasýdy jáne basqalaryn qosa alǵanda, keń aýqymdy máselelerdi qamtidy. Ásirese, saýda-ekonomikalyq, investitsiialyq yntymaqtastyqty talqylaýǵa erekshe nazar aýdarylady», - dedi Aqan Rahmetýllin Syrtqy ister ministrliginde jýrnalisterge arnalǵan brifingte.
Óz kezeginde AQSh Memlekettik hatshysynyń kómekshisi Donald Lý óz eliniń Qazaqstan úshin senimdi seriktes ekenin atap ótti.
«Biz ekonomikanyń túrli sektorlarynda, ásirese munai-gaz salasynda óte belsendi jumys istedik. Osy 30 jyl ishinde biz 37 mlrd dollar investitsiia ákeldik. Aldaǵy ýaqytta da Qazaqstannyń seriktesi bolyp, «jasyl» ekonomikaǵa kóshýge atsalysqymyz keledi, jańartylatyn energiia kózderine – jel, kún energiiasy, gidroenergetikaǵa investitsiia salmaqshymyz Bizdiń elderimiz óz tarihyndaǵy eń berik qarym-qatynastarǵa ie.
Qazir biz COVID-19, jahandyq jylyný, Aýǵanstandaǵy daǵdarys siiaqty birqatar syn-qaterge tap boldyq. AQSh uzaq jyl Qazaqstannyń senimdi seriktesi bolyp qala beredi dep úmittenemin. Men osynda kelip, Táýelsizdiktiń 30 jyldyǵyn sizdermen birge atap ótkenime qýanyshtymyn», - dedi Donald Lý.
Aita keteiik, búgingi otyrystyń kún tártibi saiasi, saýda-ekonomikalyq jáne investitsiialyq, mádeni-gýmanitarlyq, ǵylymi-tehnikalyq salalardaǵy ekijaqty qatynastardyń ózekti máselelerin jáne adam quqyqtary, adam saýdasy jáne basqa da máselelerdi qamtydy. Otyrys qorytyndysy boiynsha birlesken málimdeme qabyldandy.
