QR Úkimeti men AQSh Úkimeti arasynda «ashyq aspan» qaǵidaty boiynsha áýe qozǵalysyn jandandyrý týraly kelisimge qol qoiý boiynsha jumystar aiaqtalyp qaldy. Bul týraly QR Indýstriia jáne infraqurylymdyq damý ministrliginiń Azamattyq aviatsiia komiteti habarlady.
2018 jyldyń 21 qyrkúieginde Vashingtonda Qazaqstan men AQSh aviatsiialyq biligi arasynda ekijaqty kelissóz ótken.
«Qazirgi ýaqytta amerikandyq tarappen qol qoiýǵa josparlanǵan áýe qozǵalysy týraly úkimetaralyq kelisimniń mátinin kelisý rásimi aiaqtalyp qaldy. Osy kelisimge qol qoiý - Qazaqstan men AQSh arasynda tikelei áýe reisterin ashýǵa quqyqtyq negiz bolady», - delingen habarlamada.
Eske sala ketsek, keshe Elbasy Nursultan Nazarbaev Úkimettiń keńeitilgen otyrysynda Indýstriia jáne infraqurylymdyq damý ministri Jeńis Qasymbekke Amerika Qurama Shtattary men Japoniiaǵa tikelei áýe reisin ashý máselesi biyl sheshilýi kerektigin tapsyrǵan bolatyn.
Al arada kóp ótpei Azamattyq aviatsiia komiteti Qazaqstannan Japoniiaǵa tikelei reisti biyl ashý boiynsha jumystar júrgizilip jatqanyn habarlaǵan.
