"Qazaqstan temir joly" ulttyq kompaniiasy Qytaida koronavirýs indetiniń taralýyna bailanysty der kezinde aldyn alý sharalaryn qabyldaýda, – dep habarlaidy kompaniianyń baspasóz qyzmeti.
Búgingi tańda Qazaqstan men Qytai arasynda №103/104 "Úrýmshi – Almaty-2" jáne №13-54/14-53 "Almaty-2 - Nur-Sultan Nurly jol – Úrýmshi" eki jolaýshylar poiyzy qatynaidy. Búgingi tańda ýákiletti organmen atalǵan poiyzdardy ýaqytsha toqtatý jóninde rásimder ótkizilýde.
"Elimizde virýstyń taralýyna jol bermeý maqsatynda Dostyq jáne Altynkól stantsiialaryna kelgen poiyz jolaýshylary men brigada qyzmetkerlerin qazaqstandyq sanitarlyq qyzmeti tekseristen ótkizedi. Olar teplovizor arqyly jol júrýshilerdiń jaǵdaiyn tekserip, qaldaryn biledi. Sodan keiin ǵana jolaýshylar men poiyz brigadasy qyzmetkerlerine shekaralyq jáne kedendik tekserister júrgiziledi", - delingen aqparatta.
Jolaýshylar poiyzy qozǵalysy kezinde jolaýshylar men qyzmet kórsetý personalynyń koronavirýspen aýyryp qalý kúdiginde jolaýshylar poiyzynyń bastyǵy jedel túrde poiyz mashinisi arqyly meditsinalyq pýnkt ornalasqan stantsiianyń kezekshisin nemese vokzal boiynsha kezekshini aqparattandyrýy tiis, deidi kompaniia.
"Ol poiyzdyń toqtaý pýnktine kelýine deiin alǵashqy indetke qarsy sharalardy (aýrýdy ózge jolaýshylardan bólekteý, naýqas jolaýshy ornalasqan vagon boiynsha adamdardyń qozǵalysyna tyiym salý, árbir 30 minýt saiyn shái ydystary, eden, sanitarlyq torap jáne ózgelerine dezinfektsiia júrgizý) ótkizýge mindetti", - deidi baspasóz qyzmeti.
QR Densaýlyq saqtaý ministrligi ókilderiniń qatysýymen Almaty jáne Nur-Sultan qalalarynda nusqaýlyqtar ótkizildi.
Sondai-aq, poiyz brigadalarynyń qyzmetkerleri tynys alý maskalarymen jabdyqtalǵan jáne olardy únemi taǵyp júrý kerektigi týraly eskertilgen.
Budan basqa, Qazaqstan men Qytai arasynda temirjol kóligimen bagaj jáne qol júgin alyp júrýge baqylaý kúsheitilgen.
