Shardaralyqtar sapaly kógildir otynmen qamtyldy. Qazaqstan-Qytai gaz qubyrynyń «S» tarmaǵynda jańa kompressorlyq stantsiia jumysyn bastady. Ulttyq operator «QazTransGaz» elimizdiń Tuńǵysh Prezidenti Kúni qarsańynda sý jańa nysandy paidalanýǵa berdi. Shardara aýdany Kóksý kentine taiaý jerde ornalasqan nysan magistraldy gaz qubyrynyń josparlanǵan 8 stantsiiasynyń biri bolyp tabylady. Investitsiialyq jobany salý men odan ári paidalanýdy úsh birdei kásiporyn iske asyrǵan, dep habarlaidy Ult.kz tilshisi.
Gaz infraqurylymynyń jańa nysany gaz qubyrynyń ónimdiligin arttyrýǵa, gaz tasymaldaý kólemin jylyna 25 mlrd tekshe metrge deiin ulǵaitýǵa múmkindik beredi deidi mamandar. Ári táýligine 24 saǵat, aptasyna 7 kún úzdiksiz tasymaldaý protsesiniń barynsha tiimdiligin qamtamasyz etedi.
Bul qubyr 4 birdei memleketti – atap aitqanda Qazaqstan, Túrkimenstan, Ózbekstan jáne Qytaidy bailanystyratyn ótkizý qabilettiligi men uzyndyǵy boiynsha alpaýyt Ortalyq Aziia — Qytai transulttyq gaz qubyrynyń quramdas bóligi bolyp tabylady.
Stantsiia jetekshi álemdik óndirýshilerdiń zamanaýi jabdyqtarmen jasaqtalǵan. «Rolls Royce» kompaniiasynyń gaz aidaýshy agregattary ornatylǵan. Jobalyq qýaty saǵatyna 516 myń tekshe metr gaz aidaýǵa arnalǵan.
Paidalanylǵan innovatsiialyq jabdyq, sondai-aq qosalqy tehnologiialar kesheni magistraldy gaz qubyryn paidalanýdyń barlyq kezeńi ishinde qaýipsiz jáne tehnologiialyq úzdiksiz gaz tasymaldaýdy qamtamasyz ete alady. Mamandardyń pikirinshe, gaz infraqurylymynyń jańa nysany elimizdiń tranzittik múmkindikterin keńeitedi.
Ulttyq operator «QazTransGaz» AQ otandyq jáne sheteldik gaz naryǵynda negizgi gaz-energetikalyq jáne gaz tasymaldaý kompaniiasy bolyp tabylady. Mekeme taýarlyq gazdy magistraldyq gaz qubyrlary men gaz taratý jelileri boiynsha tasymaldaý jónindegi ortalyqtandyrylǵan infraqurylymdy basqarady. Halyqaralyq tranzitti qamtamasyz etip, gazdy ishki jáne syrtqy naryqtarda satýmen ainalysady.
