QR Premer-Ministri Baqytjan Saǵyntaev Qazaqstan Qyrǵyzstanmen shekarada EAEO keńistiginiń ekonomikalyq múddesi men ekonomikalyq qaýipsizdigin qorǵap otyr. Bul týraly QR Premer-Ministri Baqytjan Saǵyntaev Tashkentte TMD Úkimet basshylary keńesiniń otyrysynda málim etti. Atalǵan jiynda Qazaqstan-Qyrǵyz shekara aýmaǵyndaǵy baqylaý máseleleri talqylanǵan bolatyn, dep habarlaidy Ult.kz tilshisi QazAqparat agenttigine silteme jasap.
«Qazaqstan Úkimeti qyrǵyz tarapynyń bes printspti baǵyt boiynsha syndarly ustanymyna úmit artady. Birinshiden, salyqtyq ákimshiliktendirý boiynsha Qyrǵyz Respýblikasy ulttyq zańnama normalaryn EAEO quqyǵymen sáikestendirýi kerek. Ekinshi: zańsyz eksportqa, onyń ishinde kontrafaktilik ónimderdiń eksportyna qarsy is-qimyl», - dedi QR Premer-Ministri Baqytjan Saǵyntaev.
Úkimet basshysy nazar aýdartqan úshinshi másele - EAEO talaptaryn saqtaý úshin qyrǵyz tarapynyń taýarlardy turaqty jáne tiimdi veterinarlyq-sanitarlyq jáne fitosanitarlyq (karantindik) baqylaýmen qamtamasyz etýi.
"Tórtinshi: Qyrǵyz tarapy ekonomikalyq odaqqa múshe elderdiń kóliktik zańnamasyn buzýdyń aldyn alý jáne eskertý boiynsha shara qabyldaýy shart. Besinshi: kontrabanda men qazaq-qyrǵyz shekarasy arqyly esirtki zattaryn, qarý-jaraq, oq-dári jáne ózge de tyiym salynǵan zattardy zańsyz tasymaldaýǵa jol bermeý. Osylaisha, biz ózimizdiń ulttyq múddelerimizdi ǵana emes, EAEO keńistiginiń ekonomikalyq múddeler men ekonomikalyq qaýipsizdigin qorǵaýdamyz», - dep tolyqtyrdy Premer óz sózin.
Baqytjan Saǵyntaevtyń aitýynsha, Qazaqstan men Qyrǵyz shekarasynda EAEO zańnamasynyń normalary men talaptaryna tolyq sáikes keletin tekserý men baqylaý rettiligi ornaǵan.
«Biz ekijaqty ekonomikalyq yntymaqtastyq pen shekaralyq, kóliktik, fitosanitarlyq jáne veterinarlyq baqylaý, kedendik jáne salyqtyq ákimshiliktendirýdegi ózara árekettestik máseleleri boiynsha syndarly dialogqa daiynbyz. Aldaǵy ýaqytta da qyrǵyzstandyq áriptesterge EAEO quqyǵy men normalaryna beiimdelýge kómek kórsetýge ázirmiz», - dep atap ótti Baqytjan Saǵyntaev.
