Qazaqstan kórshiles elderge gýmanitarlyq kómek kórsetýde, dep habarlaidy "Ult aqparat" Syrtqy ister ministrligine silteme jasap.
Gýmanitarlyq kómek – bul álemdik qoǵamdastyq múshelerine ózara qoldaý kórsetýdiń jalpy qabyldanǵan halyqaralyq tájiribesi. Búgingi tańda COVID-19 ǵalamdyq pandemiiasy jaǵdaiynda kóptegen elder osy zaman talabyna qarsy kúreste múmkindikterdi arttyrý maqsatynda bir-birine túrli kómek kórsetýde. Qazaqstan da bul úderiske belsendi qatysýda.
Pandemiiaǵa qarsy is-qimyl kezeńinde kórshiles elderge ekonomikalyq qoldaý kórsetýge umtyla otyryp, Qazaqstan Prezidenti Q.Toqaev Qyrǵyzstan men Tájikstanǵa jalpy quny 3 mln AQSh dollarynan astam somaǵa árqaisyna 5 myń tonna kóleminde qazaqstandyq un jetkizý túrinde gýmanitarlyq kómek kórsetý týraly sheshim qabyldady.
Sheshim halyqty azyq-túlikpen úzdiksiz qamtamasyz etý maqsatynda qyrǵyz jáne tájik taraptarynyń resmi ótinishterine bailanysty qabyldandy.
Qazaqstan Prezidenti Q. Toqaevpen telefon arqyly sóilesý barysynda Tájikstan Prezidenti E.Rahmon tájik halqyna osy qiyn kezeńde qoldaý bildirip, gýmanitarlyq kómek kórsetkeni úshin alǵysyn bildirdi. Ol, sondai-aq, Tájikstan azamattaryn Otanyna jetkizýge yqpal etkeni jáne Qazaqstan aýmaǵy arqyly júkterdi tasymaldaýǵa kómekteskeni úshin rizashylyǵyn bildirdi.
Sonymen qatar, Qazaqstan jáne Qyrǵyzstan Syrtqy ister ministrleri M.Tileýberdi men Ch.Aidarbekov telefon arqyly sóilesý barysynda qyrǵyz tarapy Qazaqstanǵa gýmanitarlyq kómek kórsetý týraly sheshim qabyldaǵany úshin shyn júrekten alǵys bildirdi.
Jaqyn arada atalǵan júkter Qyrǵyzstan men Tájikstanda jetkiziletin bolady.
Qazaqstan, halyqaralyq qoǵamdastyqtyń jaýapty múshesi retinde, jahandyq koronavirýstyq pandemiia jaǵdaiynda shet qalmaidy jáne seriktes elderge qajetti gýmanitarlyq kómek kórsetýdi jalǵastyrýda. Atap aitqanda, ú.j. aqpanda COVID-19 indetiniń órship turǵan kezinde Qazaqstan alǵashqylardyń biri bolyp Qytaiǵa meditsinalyq qorǵaý quraldaryn birneshe ret jetkizý arqyly áriptestik qoldaý kórsetti.
Jalpy gýmanitarlyq kómek kórsetý Qazaqstannyń syrtqy saiasatynyń mańyzdy baǵyttarynyń biri bolyp tabylady. Ótken jyldary Qazaqstan Antigýa men Barbýda, Aýǵanstan, Bangladesh, Qyrǵyzstan, Moldova, Mońǵoliia, Mianma, Pákistan, Serbiia, Siriia, Túrkiia, Japoniia jáne t. b. elderge ártúrli kómek jibergen bolatyn.
