Parlament Senatynyń jalpy otyrysynda «2003 jylǵy 25 jeltoqsandaǵy Qazaqstan Respýblikasynyń Úkimeti men Qyrǵyz Respýblikasynyń Úkimeti arasyndaǵy Memlekettik shekara arqyly ótkizý pýnktteri týraly kelisimge ózgerister engizý týraly hattamany ratifikatsiialaý týraly» Zańy qabyldandy, dep habarlaidy "Ult aqparat".
Hattamada Sarytóbe jáne Aýhatty avtomobil ótkizý pýnkteriniń mártebesin ekijaqtydan «kópjaqty halyqaralyqqa» aýystyrý eskerilgen. Sonymen qatar, «Novovoskresenovka» ótkizý beketiniń ataýyn «Sypatai batyr» dep ózgertý kózdelgen.
«Qazirgi kezde eki el arasynda 11 avtomobil ótkizý beketi bar, olardyń beseýi kópjaqty halyqaralyq, al altaýy - ekijaqty. Ekijaqty ótkizý beketteriniń tórteýinen ótetin adamdar men kólik quraldarynyń qarqyny tómen bolýy sebepti olar 2010 jyly jabylǵan. Qazirgi kezde jumys istep turǵan barlyq ótkizý beketinen jylyna 11 milliondai adam, 1 mln 300 myńdai jeńil kólik, 400 myńnan astam júk kólik quraly ótedi.
Sondai-aq, 2018 jyly avtomobil kóligimen júk tasymaldaý Qazaqstan men Qyrǵyzstan arasynda 48 paiyzǵa artyp, 1,7 mln tonnany qurady», - dedi Indýstriia jáne infraqurylymdyq damý ministri Beibit Atamqulov.
Onyń sózine qaraǵanda, eki el arasynda adamdar men kólik quraly eń kóp ótetin beket Qordai bolǵandyqtan, alǵashqy kzeńde ony jańartýǵa baǵyttalǵan jumystar júrgizilýde jáne qurlysty bastaý 2020 jyldyń naýryz aiyna josparlanǵan. Sol sebepti Sarytóbe jáne Aýhatty avtomobil beketterin kópjaqty halyqaralyq mártebesine aýystyrý: birinshiden, Qordai ótkizý beketi jóndeý jumysyna jabylǵanda, ótkinshiler aǵyny atalǵan eki beketti paidalanady. Ekinshiden, úshinshi elderdiń júk kólikteri osy beketter arqyly ótýge múmkindik ala otyryp, elimizdiń tranzittik áleýetin odan ári jaqsartýǵa yqpal etedi.
