Qazaqstan jyl saiyn qurǵaqshylyq saldarynan 93 mlrd teńge joǵaltady. Bul týraly búgin Aqordada Memleket basshysy Qasym-Jomart Toqaevtyń Prezidenttik kadr rezervine engen jastarmen kezdesýinde Japoniia ulttyq saiasi zertteýler institýtynyń PhD doktoranty Zúlfiia Súleimenova aitty, dep habarlaidy QazAqparat.
«Meniń dissertatsiiam Syrdariia ózeni basseinindegi sý yntymaqtastyǵyna arnalǵan. Bul taqyryp Qazaqstan úshin ózekti. Qazirdiń ózinde biz sý táýekelderimen betpe-bet kelip otyrmyz. Búginde sý kúizelisiniń deńgeii 25-ten 75 paiyzǵa deiin baǵalanady. Qazaqstan jyl saiyn qurǵaqshylyq saldarynan oryn alatyn shóleittený nátijesinde shamamen 93 mlrd teńge joǵaltady», - dedi ol.
Osy rette ol elimizdiń sý jáne ekologiialyq kúntártibinde turǵan birqatar usynys jasady.
«Birinshiden, ekonomikanyń sý qamtymdylyǵyn qysqartý qajet. Biz daiyndalýyna sýdyń óte úlken mólsheri shyǵyndalatyn taýarlar óndiremiz. Tapshylyq onyń jetispeýshiliginen ǵana emes, sonymen qatar aýyl sharýashylyǵy men energetika sektoryndaǵy suranystyń joǵary bolýynan oryn alyp otyr. Ekinshiden, jerasty sýynyń lastanýyna jol bermeý sharalaryn kúsheitý qajet», - dedi bolashaq ǵalym.
Onyń aitýynsha, aýanyń jáne jer betindegi sýdyń lastanýyn tómendetý, aýyl sharýashylyǵynda ziiandy himikattar paidalanýdy azaitý esebinen jerasty sýlarynyń lastanýyn azaitýǵa bolady. Tsirkýliarly ekonomika men qaldyqsyz óndiristi damytýdy yntalandyrý da qajet.
«Úshinshiden, halyqaralyq yntymaqtastyqty kúsheitken jón. Qazaqstan sýynyń 44 paiyzy odan tysqary aýmaqta qalyptasady. Keibir aýdandarda bul tsifr 80 paiyzǵa jetedi. Sondyqtan kórshilerimizben tiimdi yntymaqtastyqty qalyptastyrýymyz qajet. Sebebi sý – bul bizdiń ortaq bailyǵymyz. Tórtinshiden, ár adamnyń jaýapkershiligi ideiasyn ilgeriletýimiz qajet. Bul máselemen osy salanyń mamandary ǵana ainalyspaýy tiis», - dedi Zúlfiia Súleimenova.
