Sýret: Kazinform
Almatyda Qazaqstan quramasyn Frantsiia astanasy Parij qalasynda ótetin HHHIII jazǵy Olimpiadaǵa shyǵaryp salý rásimi boldy, dep habarlaidy "Ult aqparat" Kazinform-ǵa silteme jasap.
Qazaqstandyq sportshylardy Frantsiia astanasy Parij qalasynda ótetin HHHIII jazǵy Olimpiadaǵa shyǵaryp salýǵa QR Týrizm jáne sport ministri Ermek Marjyqpaev, Olimpiada chempiondary Ermahan Ybraiymov, Islam Bairamýkov, Olga Shishigina, Dmitrii Balandin jáne BAQ ókilderi keldi.
QR Týrizm jáne sport ministri Ermek Marjyqpaev sportshylar jáne jattyqtyrýshylar quramyna aldaǵy jarystarǵa sáttilik tiledi.
Ministr bul oqiǵanyń elimiz úshin erekshe mańyzǵa ie ekenin atap ótti.
"Sizderdiń aldyńyzda elimizdi Parij Olimpiadasynda tanystyrý, el namysyn abyroimen qorǵaý siiaqty mańyzdy ári óte jaýapty mindet tur. Sizderdiń chempiondyq minezińiz, tabandylyǵyńyz, jeńiske degen erik-jigerińiz, osy kúnge deiin jiǵan tájiribelerińiz, jattyqtyrýshylardyń, dárigerlerdiń, massaj jasaýshylardyń qajyrly eńbeginiń arqasynda úlken nátijege jetetinimizge senimdimin. Táýelsizdik jyldarynda Qazaqstan jazǵy jáne qysqy Olimpiia oiyndarynyń 79 júldegerin, onyń ishinde 15 Olimpiada chempionyn tárbielep shyǵardy. Olimpiadadaǵy jetistikter — búkil eldiń álemdegi imidji, memlekettiń ál-aýqatynyń kórsetkishi, eń bastysy, bul — sizderdiń kópjyldyq jáne qajyrly eńbekterińizdiń nátijesi", — dedi Ermek Marjyqpaev.
Sýret: Kazinform
Erkin kúresten eńbek sińirgen sport sheberi jáne Sidnei Olimpiadasynyń kúmis júldegeri Islam Bairamýkov, qazaqstandyq sportshylarǵa senim mol ekenin jetkizdi.
"Olimpiada oiyndarynda jeńiske jetý – kez kelgen sportshynyń armany.Sport zalyna kelgen kúninen bastap, aldyna osyndai maqsat qoiady. Bizde qazir erkin kúresten tórt joldama bar. Qazaqstan komandasynyń múshesi Meirambek Qartbai jaqynda aldy. Jigitterdiń jeńis tuǵyrynan kórinýge múmkindikteri bar",- dedi Islam Bairamýkov.
Frantsiia astanasynda Qazaqstan quramasy sapynan 80 sportshy sporttyń 25 túrinen baq synap, 81 medal jiyntyǵyna talasady.
Aita ketý kerek, Qazaqstan Táýelsizdik jyldarynan beri osymen segizinshi márte jazǵy Olimpiadaǵa qatyspaq.
Qazaqstan quramasynyń sportshylary biyl alǵash ret Olimpiada baǵdarlamasyna engen breiking jáne badminton siiaqty sport túrlerinen óner kórsetedi. Breikingten el namysyn Ámir Zakirov qorǵasa, badminton saiysynda Dmitrii Panarin baq synaidy.
Sýret: Kazinform
Olimpiia oiyndarynyń ashylý saltanaty 26 shildede Parijdegi Sena ózeninde ótedi. Jarysqa 205 elden 10 myńnan astam sportshy qatysady. Olar 32 sport túrinen 329 medal jiyntyǵyn sarapqa salady.
Naqtyraq aitsaq, boks, dziýdo, sportttyq gimnastika, jeńil atletika, baidarka men kanoede esý, oqpen atý, semserlesý, grek-rim kúresi, erkin kúres, sadaq atý, stendtik atý, tennis, veloshosse, júzý, zamanaýi bessaiys, taekvondo, velotrek, batýt gimnastikasy, badminton, akademiialyq esý, kórkem gimnastika, triatlon, ústel tennisi, quzǵa shyǵý jáne breikingten Olimpiada oiyndarynda synǵa túsedi.
Osyǵan deiin Almatydaǵy Olimpiadaǵa daiyndyq ortalyǵynda sportshylardyń qalai jattyǵyp jatqany týraly jazǵan edik.
Esterińizge sala keteiik, elimizde alǵash ret Olimpiada oiyndaryn bes birdei telearna tikelei efirde kórsetetin bolady.
Olimpiada oiyndarynan 21 qazaqstandyq jýrnalist tikelei habar taratady.
