Búgin fýtboldan Qazaqstan kýbogy toptyq kezeńiniń úshinshi týry aiaqtaldy, dep habarlaidy "Ult aqparat".
Qaraǵandynyń «Shahteri» óz alańynda elordalyq SDIýSShOR №8 komandasyn 7:1 esebimen tas-talqan etip jeńdi. Qaraǵandylyq klýb sapynan Oralhan Ómirtaev 16, 42, Aidos Táttibaev 19, 55, Jan-Áli Pairýz 46, 59-minýttarda qos goldan soqsa, Evgenii Shikavka 62-minýtta esepti ústemelei tústi. Oǵan elordalyq komandadan 83-minýtta Karim Smykov jalǵyz golmen jaýap qaiyrdy.
Aqtaýdyń «Kaspii» jáne Taldyqorǵannyń «Jetisý» arasyndaǵy kezdesý taǵdyryn jalǵyz gol sheshti. Ony aqtaýlyq klýbtan Ýadjdi Sali 76-minýtta óziniń enshisine jazdy. Osylaisha «Kaspii» 1:0 esebimen basym tústi.
Elordalyq «Astana» óz alańynda Oraldyń «Aqjaiyǵyn» 1:0 esebimen jeńdi. Jalǵyz goldy elordalyq Abat Aiymbetov soqty.
Qostanaidyń «Tobyly» óz alańynda Túrkistannyń «Maqtaral» komandasyna 3:4 esebimen jol berdi. Birinshi ligada dop tebetin túrkistandyq klýb sapynan Vladimir Sedelnikov 8, Edige Oralbai 11, Rashid Liýhai 17-minýttarda qatarynan úsh gol soǵyp ketti. Odan keiin qostanailyq komandadan Serikjan Mýjikov 30, (1:3), Jaslan Jýmashev 69-minýttarda esep aiyrmasyn qysqartsa, «Maqtaral» sapynan Dierjon Aripovtyń avtogolynan keiin tarazy basy teńesti. Kezdesý taǵdyryn sheshken goldy 91-minýtta Mádi Qaseiin soǵyp ketti. Nátijesinde «Maqtaral» azýly qarsylasyn 4:3 esebimen tize búktirdi.
Sondai-aq, 24 shildede «Qyzyljar» men «Ordabasy» 1:1 esebimen teń tústi. Syrt alańda «Turan» «Qairatty» 1:0, «Qaisar» «Aqtóbeni», «Taraz» «Atyraýdy» 2:1 esebimen jeńip ketti.
