QR Premer-Ministri Álihan Smaiylov Indýstriia, Qarjy, Ulttyq ekonomika ministrlikterine jyljymaly temir jol quramdary men teńiz paromdaryn satyp alý sharalaryn ázirleýdi tapsyrdy, dep habarlaidy QazAqparat.
«Jyljymaly júk vagondarynyń parki jyldan jylǵa tozyp keledi. Al tolyqqandy teńiz saýda flotynyń bolmaýynan, teńiz logistikalyq infraqurylymyn tolyq qýatynda paidalana almai otyrmyz. Sondyqtan Indýstriia ministrligine Qarjy, Ulttyq ekonomika ministrlikterimen, «Qazaqstan temir joly» kompaniiasymen birlesip, jyljymaly temir jol quramdary men teńiz paromdaryn satyp alý jáne jańartý úshin qoldaý sharalaryn ázirleýdi tapsyramyn», - dedi ol Úkimet otyrysynda.
Sondai-aq, ol biyl respýblikalyq mańyzy bar 3,6 myń shaqyrym avtojol salynyp, jóndeletinin atap ótti.
«Indýstriia ministrligi «Qazavtojol» kompaniiasymen birge biylǵy qurylys maýsymyn barynsha tiimdi paidalanyp, josparlanǵan 8 ýchaskeniń barlyǵyn iske qosýdy qamtamasyz etsin.
Tranzittik tasymal áleýetin arttyrý úshin shekaradan ótý kezindegi ákimshilik kedergilerdi azaitý qajet. Kedendik-shekaralyq rásimderdi múmkindiginshe jeńildetý kerek», - dedi Premer-Ministr.
