Brand Finance kompaniiasy biylǵy 100 ulttyq brend reitingin jariialady, dep habarlaidy "Ult aqparat" ranking.kz aqparat kózine silteme jasap.
Kompaniianyń málimetinshe, kez kelgen eldiń brendi memlekettiń abyroi-bedeline, keleshegin boljai bilýine, eldiń bailyǵyna, básekege qabiletine aitarlyqtai yqpal etedi. Biylǵy zertteý jumysy damýshy elderdiń ulttyq brendteri damyǵan elderge qaraǵanda qarqyndy túrde órkendep kele jatqanyn kórsetken. Máselen, damýshy elderde brend qunynyń ortasha ósimi 13,9 paiyzdy kórsetse, damyǵan elderde 0,4 paiyzdyq ósimge jetken.
«Reiting 100 eldi saraptaidy. Álemdegi eń qymbat brendter kóshin - AQSh, Qytai jáne Germaniia saqtap qaldy. AQSh-tyń brend quny 27,8 trln AQSh dollaryn qurasa, Qytai - 19,5 trln AQSh dollary, Germaniia - 4,9 trln AQSh dollaryna jetken. Eń qymbat brendi bar alǵashqy elderdiń bestigin Japoniia (4,5 trln AQSh dollary) jáne Ulybritaniia (3,9 trln AQSh dollary) túiindeidi. Sonymen qatar alǵashqy ondyqqa Frantsiia, Úndistan, Kanada, Ońtústik Koreia jáne Italiia kirdi. Qazaqstan 7 satyǵa kóterilip, Jańa Zelandiia (45 oryn) men Iran (43 oryn) arasynda 44-shi orynǵa (2018 jyly - 51 oryn) ie boldy. Aita ketý kerek, Qazaqstannyń brend quny keibir Eýropa elderinen (mysaly, Portýgaliia, Rýmyniia, Majarstan, Slovakiia jáne basqalary) góri joǵary» delingen habarlamada.
Eýraziialyq ekonomikalyq odaq elderi arasynda reitingke 14-shi orynmen Resei (2018 jyly 18-shi oryn) kiredi.
«Ulttyq brendterdiń reitingin túzý kezinde ekonomikalyq, demografiialyq jáne saiasi faktorlar, onyń ishinde investitsiialyq kórsetkishter, týristik tartymdylyq, zertteletin elderdiń ekonomikalyq ósý dinamikasy, ulttyq taýarlar men qyzmetterdiń óndirisi, tutynylýy men eksporty, adam kapitaly jáne basqa da tórt segmentke biriktirilgen parametrler eskeriledi», - dep habarlaidy aqparat kózi.
Aita keterligi, biylǵy reitingte Qazaqstan ulttyq brend qunynyń ósimi boiynsha úzdik on eldiń qatarynan kórinip otyr. Bizdiń eldiń brend quny 41,9 paiyzǵa ósip, ósimi joǵary ondyq ishinde segizinshi orynǵa taban tiregen. Brend qunynyń ósimi jaǵynan Gana bir jylda 67,1 paiyzdyq ósimge jetse, odan keiingi oryndardan Ýganda (+55,7 paiyz), Paragvai (+55,4 paiyz), Bangladesh (+53,8 paiyz) jáne Mysyr (+50,1 paiyz) kóringen.
