Qazaqstan koronavirýs infektsiiasynyń bolýy yqtimal ekinshi tolqynyna daiyndalyp jatyr. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Qazir Qazaqstanda koronavirýs infektsiiasy jaǵdaiy qalypty. Aýrý juqtyrý men ólim-jitim sanynyń negizgi kórsetkishteri tómendep jatqanyn baiqaýǵa bolady. Osyǵan qaramastan, biz kórshilerimizdi, álem elderin baqylap otyrmyz. Qazir Eýropa aimaǵynda, Italiia, Ispaniia, Germaniia, Túrkiia jáne Ońtústik Koreiada aýrý sany kúrt ósti. Bul rette TMD elderindegi aýrý kólemi 0,5 paiyzdy kórsetti, bul Qazaqstandaǵy kórsetkishten 5 esege kóp. Bul másele alańdatpai qoimaidy. Qazaqstan da ózge elder sekildi koronavirýs infektsiiasynyń bolýy yqtimal ekinshi tolqynyna daiyndalyp jatyr», - dedi ministr Ortalyq kommýnikatsiialar qyzmetindegi onlain brifingte.
Ministr respýblika boiynsha 71 126 tósek-oryn daiyndaý josparlanǵanyn, qazirgi ýaqytta – 10 257 tósek-oryn bar ekenin jetkizdi.
«Tósek-oryn qorynyń 15% naýqastar jatyr, olar koronavirýs nemese koronavirýs pnevmoniiasymen aýyryp jatyr. Onyń ústine 13 modýldi juqpaly aýrý aýrýhanalaryn salýdy josparladyq. Eki iri klinikada qaita óńdeý jumystary júrýde. Emhanalar deńgeiindegi 3640 kóshpeli brigada uiymdastyryldy. 5098 ókpeni jasandy jeldetý apparaty jetkizildi. 21 566 tósek-oryn ottegimen qamtamasyz etildi», - dep túsindirdi A. Tsoi.
Buǵan deiin ministr mektep oqýshylaryn birinshi toqsanda qashyqtan oqytýdy usynǵan edi.
«Birinshi karantinde mektepke deiingi uiymdarda kezekshi toptar ashýymyz sátsiz tájiribe boldy, onda koronavirýs infektsiiasy tirkelip, jabylyp jatty. Iaǵni, biz úshin elimizdegi qazirgi aýrýdyń tómendeý qarqynyn ustap turý mańyzdy. Balalar arasynda aýrýdy taratyp almaý kerek. Qashyqtan oqytý sharasy ýaqytsha ekenin taǵy da aita keteiin», - dedi Aleksei Tsoi.
