Qazaqstan koronavirýsty jeńdi me? Bul suraqqa "Referendým" onlain-marafony barysynda qazaqstandyq QazVac vaktsinasyn ázirleýshilerdiń biri Kúnsulý Zakaria jaýap berdi, - dep habarlaidy Tengrinews.kz.
Biologiia ǵylymdarynyń doktory koronavirýs kezinde densaýlyq saqtaý salasy deńgeii joǵary kóterilgenin basa aityp, qazaqstandyqtardy bosańsymaýǵa shaqyrdy.
"Koronavirýs barlyq álsiz tusymyzdy, densaýlyq saqtaý júiesindegi, ǵylym júiesindegi sáikessizdikti kórsetti. Dál osy jaǵdai ǵylym men jalpy densaýlyq saqtaý júiesiniń damýyna úlken serpin berdi. Qazir Ońtústik-Shyǵys Aziiada ne bolyp jatqanyn jaqsy bilesiz. Bul indettiń zardabyn Qytai, Úndistan, Soltústik Koreia jáne t.b. kórip jatyr", - dedi BǴM Ǵylym komitetiniń Biologiialyq qaýipsizdik problemalary ǵylymi-zertteý institýtynyń bas direktory.
Kúnsulý Zakaria COVID-19-ǵa bailanysty epidemiologiialyq jaǵdaidyń turaqtalýyn "vaktsinany ázirleýge úlken serpin jáne der kezinde nusqaýlar bergen" Prezident bastaǵan ujymdyq jumyspen bailanystyrdy.
"Bul tynyshtyq neni bildiredi (COVID-19 jaǵdaiyndaǵy - esk.)? Bul bizdiń elde ujymdyq immýnitet qalyptasqanyn bildiredi. Qazaqstan aýmaǵynda álemniń barlyq elinen alynǵan vaktsinalar qoldanylyp, halqymyzdyń 70 paiyzy ekpeden ótti - bul indetti tejeidi. Biraq bul adam ómirine engen jańa infektsiia ekenin, áli turaqtanbaǵanyn jaqsy bilýimiz kerek. Ol mýtatsiiaǵa ushyraidy, himera siiaqty ózgeredi. Sondyqtan, jańa túrler, jańa tolqyndar bolýy múmkin. Bizdiń mindetimiz osy jańa tolqyndarǵa árqashan daiyn bolý. Daiyndyq - bul turaqty revaktsinatsiia", - dedi ol.
QazVac ázirleýshisi álemniń barlyq kúshti, eń iri elderinde ǵylym ekonomikanyń lokomotivi ekenin atap ótti. Sondyqtan ekonomikamyz myqty bolýy úshin Qazaqstanda ǵylymdy damytý qajet, dep túiindedi sózin Kúnsulý Zakaria.
