QR Densaýlyq saqtaý ministrligi Sanitariialyq-epidemiologiialyq baqylaý komitetiniń resmi ókili Erjan Baitanaev Qazaqstan Úkimeti koronavirýsqa qarsy vaktsinatsiia júrgizý úshin qytailyq preparat satyp alatyny týraly aqparatqa túsinik berdi, dep habarlaidy QazAqparat.
«Qazaqstan Úkimeti koronavirýs infektsiiasyna qarsy eshqandai da qytai vaktsinasyn satyp almady jáne josparlap ta otyrǵan joq. Qurmetti azamattar! Sizderden áleýmettik jelilerdegi jalǵan aqparattarǵa ermeýdi jáne tek resmi aqparat kózderine senýdi ótinemin. Esterińizge sala keteiik, qasaqana jalǵan aqparat taratý QR QK 274-babyna sáikes qylmystyq jaýapkershilikke ákep soǵady», - dedi Erjan Baitanaev.
Onyń atap ótýinshe, Qazaqstanda 2021 jylǵy 1 aqpannan bastap Reseide shyǵarylǵan Gam-KOVID-Vak («Spýtnik V») vaktsinasyn paidalana otyryp, KVI-ǵa qarsy vaktsinatsiia bastalady. Odan ári vaktsinalaý protsesine Qaraǵandy farmatsevtikalyq kesheniniń bazasynda óndirilgen Gam-KOVID-Vak vaktsinasy qosylady. 2021 jyldyń 2-toqsanynan bastap vaktsinalaý protsesine otandyq - QazCovid-In preparatyn qosý josparlanyp otyr. Bul vaktsina qazirgi ýaqytta klinikalyq synaqtyń 3-kezeńinen ótýde.
Gam-KOVID-Vak vaktsinasy Resei Federatsiiasynda memlekettik tirkeýden ótken jáne birneshe ai boiy halyqtyń osal toptaryn immýndaý úshin qoldanylyp keledi. Resei Federatsiiasynyń Tikelei investitsiialar qorynyń málimetteri boiynsha, bul vaktsinany satyp alýǵa 50-ge jýyq memleket ótinish bergen.
«Qoldanystaǵy zańnamalarǵa sáikes, Qazaqstan Respýblikasynyń aýmaǵyna tirkelmegen dárilik zattardy ákelý kezinde dárilik zattyń sapasyn rastaityn óndirýshiniń qazaq nemese orys tilderine aýdarmasy bar qujatynyń elektrondyq kóshirmesi bolýy qajet (taldaý sertifikattary nemese synaq esebi nemese sapany baǵalaý kórsetkishteri bar sapa pasporty). Qazirgi ýaqytta Qazaqstan Respýblikasy Úkimetiniń 2020 jylǵy 15 jeltoqsandaǵy №850 qaýlysymen Qazaqstan Respýblikasynda óndirilgen COVID-19 koronavirýsyna qarsy vaktsinalardy ýaqytsha memlekettik tirkeý erejeleri bekitildi», - dedi komitettiń resmi ókili.
