Qazaqstan COVID-19-ǵa qarsy vaktsinaǵa qajettiligin qamtamasyz etý úshin áleýetti óndirýshilermen jumys júrgizip jatyr. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Ministrlik jergilikti atqarýshy organdarmen birlesip, aýrý órshigen jaǵdaida halyqtyń meditsinalyq kómekke qoljetimdiligin qamtamasyz etýge baǵyttalǵan birqatar sharany júzege asyryp jatyr. Halyqtyń álsiz toptaryn vaktsinatsiialaý úshin tumaýǵa qarsy 2,2 mln doza vaktsina satyp alyndy. Vaktsinatsiialaý 15 qyrkúiekte bastalyp, búgingi kúni 1,5 mln-nan astam adam egildi. Eldiń COVID-19-ǵa qarsy vaktsinaǵa qajettiligin qamtamasyz etý úshin áleýetti óndirýshilermen jumys júrgizilip jatyr. Vaktsinatsiialaýǵa jatatyn halyqtyń aldyn ala sany 2,8 mln adamdy nemese turǵyndardyń 15 paiyzyn quraidy», - dedi ministr Aqordada Memleket basshysy Qasym-Jomart Toqaevtyń tóraǵalyǵymen ótken keńeste .
Sonymen qatar ol karantin sharalarynyń oryndalýyn baqylaý jumystary júrgizilip jatqanyn aitty.
«Monitoring tobynyń jumysy barysynda 17 tamyzdan beri 14 812 reid júrgizilip, 5 147 nysanda karantin rejimin buzý anyqtaldy. Karantin rejimin negizgi buzýshylyqtar – bul adamdar kóp jinalatyn sharalar ótkizý, maska rejimin buzý, áleýmettik araqashyqtyq saqtamaý jáne antiseptiikterdiń bolmaýy. Karantin rejimin buzýshylarǵa jalpy somasy 300 mln teńgeden asatyn 5160-tan astam ákimshilik aiyppul salyndy», - dedi Aleksei Tsoi.
