Foto: QR TSM
QR Premer-ministriniń orynbasary Ermek Kósherbaev Qazaqstanǵa arnaiy shaqyrtýmen kelgen Halyqaralyq basketbol federatsiiasynyń (FIBA) bas hatshysy, 2028 jylǵy Los-Andjeles Olimpiadasynyń úilestirý komissiiasynyń múshesi Andreas Zaglispen resmi kezdesý ótkizdi, dep habarlaidy Ult.kz.
Kezdesýge QR týrizm jáne sport ministri Erbol Myrzabosynov, sondai-aq Qazaqstan basketbol federatsiiasynyń prezidenti Abai Alpamysov qatysty.
Jiynda taraptar Qazaqstanda jáne halyqaralyq deńgeide basketbol sportyn damytý máselelerin talqylady. Ásirese ulttyq federatsiialardyń áleýetin arttyrýǵa baǵyttalǵan FIBA Plus baǵdarlamasynyń Qazaqstanda júzege asyrylý múmkindikteri sóz boldy. Bul bastama Qazaqstan ulttyq basketbol federatsiiasymen birlesip iske asyrylmaq.
Bul kezdesý Memleket basshysy Qasym-Jomart Toqaevtyń halyqaralyq sport uiymdarymen bailanysty kúsheitý jónindegi tapsyrmasyn júzege asyrý aiasyndaǵy mańyzdy qadam bolyp otyr. Prezident Parij Olimpiadasy-2024 júldegerlerimen kezdesýde sportshylardyń básekege qabilettiligin arttyrý jáne álemdik jarystardy Qazaqstanda ótkizý mindetin qoiǵan bolatyn.
Osy maqsatta elimizde halyqaralyq sport uiymdarymen turaqty jáne júieli dialog ornaýda. Qazaqstanda Halyqaralyq dziýdo federatsiiasynyń prezidenti Mariýs Vizer, Halyqaralyq aýyr atletika federatsiiasynyń prezidenti Muhammed Djalýd Ál-Shammari, Halyqaralyq sý sporty federatsiiasynyń prezidenti Hýsein Ál-Mýsallam jáne Birikken kúres álemi (UWW) uiymynyń prezidenti Nenad Lalovich saparlap keldi. Olar eldegi sport infraqurylymymen tanysyp, Qazaqstanmen strategiialyq áriptestikti nyǵaitý máselelerin talqylaǵan bolatyn.
Endi Qazaqstanǵa komandalyq, oiyn sport túrleriniń ókilderi de kele bastaidy. Máselen, osy kúnderi FIBA bas hatshysy Andreas Zaglis Qazaqstanǵa kelse, al aldaǵy ýaqytta UEFA prezidenti Aleksandr Cheferinniń sapary josparlanyp otyr.
Bul elimizdiń halyqaralyq sport qoǵamdastyǵymen bailanysynyń tereńdep kele jatqanyn kórsetedi. Qazaqstan Úkimeti aldaǵy ýaqytta da osyndai joǵary deńgeidegi kelissózder arqyly Qazaqstan sportynyń áleýetin kúsheitip, álemdik arenadaǵy bedelin arttyrýdy jalǵastyra beredi.
