Elimizde qazaq tilin meńgergen turǵyndar úlesi 83 paiyzdan asty. Bul týraly Úkimet otyrysynda «Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń» ótken jylǵy qorytyndysyn shyǵarǵan QR Mádeniet jáne sport ministri Arystanbek Muhamediuly aitty, dep habarlaidy "Ult aqparat".
«Jyl saiynǵy júrgizilgen zertteýler nátijeleri turǵyndardyń memlekettik tildi meńgerýinde oń dinamikany kórsetti. 2017 jyly memlekettik tildi meńgergen turǵyndardyń úlesi 83,1 paiyzdy qurady. 2016 jyl kórsetkish birshama tómen bolatyn. Úsh tildi meńgergen eresek turǵyndar úlesi 22,3 paiyzdy qurady», - dedi ministr.
Onyń dereginshe, «Úsh tildi meńgerý aiasynda memlekettik qyzmetshilerdi oqytýdy uiymdastyrý» qyzmetin júzege asyrý maqsatynda QR Prezidenti janyndaǵy Memlekettik basqarý akademiiasymen ózara túsinistik týraly kelisimge qol qoiylǵan. 2017 jyly joba aiasynda ortalyq atqarýshy organdardan memlekettik tildi oqytý kýrsyna 610 adam qatysty.
«Sonymen qatar respýblikada 89 aimaqtyq memlekettik tildi oqytý ortalyǵy jumys isteidi. Oqytý ortalyqtary Til týraly zańǵa sáikes Qazaqstan azamattarynyń memlekettik tildi meńgerýi maqsatynda oqytý kýrstaryn uiymdastyrady. Osy maqsatta ótken jyly til oqytý ortalyqtarynda 58348 adam memlekettik til oqytý kýrstarynan ótti. «Qaztest» júiesi negizinde qazaq tilin bilý deńgeiin anyqtaý maqsatynda 2017 jyly testileýden ótkenderdiń jalpy sany 94458 adam, onyń ishinde memlekettik qyzmetshiler sany - 22837 adam», - dedi Arystanbek Muhamediuly.
