"Qazaqstan halqyna" qorynyń qamqorshylyq keńesiniń alǵashqy uiymdastyrý otyrysy ótti. Is-shara aiasynda jumys toby quryldy, ol qor qyzmetiniń tujyrymdamasyn ázirleidi.
Qordyń baspasóz qyzmetiniń málimetinshe, qamqorshylyq keńesiniń músheleri qyzmetkerlerdi, eń aldymen memlekettik qyzmetkerlerdi, biýdjettik sala qyzmetkerlerin bir kúndik jalaqyny aýdarýǵa májbúrleý jaǵdailary týraly óz pikirin bildirdi. Qamqorshylyq keńesiniń músheleri buǵan úzildi-kesildi kelispeitinin bildirdi.
"Biz búkil qazaqstandyqtarǵa úndeimiz jáne "Qazaqstan halqyna" qory tek jeke jáne zańdy tulǵalardyń erikti qaiyrymdylyqtarynan qalyptasatynyna taǵy da nazar aýdaramyz jáne qorǵa óz úlesin qosqan qazaqstandyqtar men uiymdarǵa alǵys bildiremiz jáne óz tarapymyzdan kómek muqtaj adamdarǵa jetetinine kepildik beremiz!",- dedi Qamqorshylyq keńesiniń músheleri.
Sondai-aq, otyrysta qaiyrymdylyq qory qyzmetiniń tujyrymdamalyq máseleleri talqylanǵan. Qamqorshylyq keńes músheleri qordyń halyqpen ózara is-qimyl tetikterine, qazaqstandyqtardyń qorǵa qalai júginetinine, ótinimder qaldyrýyna basty nazar aýdarǵan.
"Sondai-aq, qor qaiyrymdylyq uiymdarymen, memlekettik organdarmen jáne qaiyrymdylyq kómek kórsetýge tartylǵan basqa da uiymdarmen yntymaqtastyq formatyn aiqyndaýǵa tiis. Ózara is-qimyl quraly qordyń elektron portaly bolǵany durys. Ońtaily sheshim qabyldaý úshin jumys toby quryldy, onda "Qazaqstan halqyna" qory qyzmetiniń tujyrymdamasy ázirlenedi", - delingen habarlamada.
Esterińizge sala keteiik, 2022 jylǵy 16-19 qańtar aralyǵynda (qosa alǵanda) qoǵamdyq qorǵa 16 167 qazaqstandyqtan 29,3 million teńge túsken. 75 zańdy tulǵa men iri biznesmenderden 19,2 milliard teńge túsken.
Prezident "Qazaqstan halqyna" qoryn qurý týraly 11 qańtarda málimdedi. "Bul - barlyq qazaqstandyqtardyń qory. Bul - halyq qory. Ol ákimshilik nemese úkimetke qarasty jumys istemeidi", - dedi Memleket basshysy.
15 qańtarda qordy Bolat Jámishev basqaratyny belgili boldy. Al 16 qańtarda qamqorshylyq keńes músheleri sailandy.
