Elimizdegi etnomádeni birlestikterdiń jastar qanaty bolyp sanalatyn «Jańǵyrý joly» qozǵalysynyń jumysy jandandyrylady. Bul týraly Memlekettik hatshysy Qyrymbek Kósherbaev Qazaqstan halqy Assambleiasynyń keńeitilgen otyrysynda aitty, dep habarlaidy QazAqparat.
«Assambleia jumysynyń ekinshi negizgi baǵyty – uiymnyń praktikalyq sharalaryn, alýan túrli jáne kópformatty áleýmettik jobalaryn Memleket basshysynyń eldi damytýǵa arnalǵan tapsyrmalaryn oryndaýǵa baǵyttaý. Assambleia qyzmetinde negizgi nazardy mynadai baǵyttarǵa aýdarý usynylady.
Etnosaralyq salada Assambleia men memlekettik saiasat júiesin institýtsionaldyq jáne infraqurylymdyq nyǵaitýdy jalǵastyrý qajet. Assambleianyń jalpy jastar quramyndaǵy, etnomádeni birlestikterdiń jastar qanaty – «Jańǵyrý joly» qozǵalysynyń jumysyn jandandyrýǵa erekshe nazar aýdarylatyn bolady», -degen Memlekettik hatshy Assambleianyń barlyq qoǵamdyq institýttarynyń jumysy jańa formatta iske asý kerektigin basa aitty.
«Assambleia quramyndaǵy qoǵamdyq kelisim keńesiniń, analar keńesiniń, ǵylymi-sarapshylyq keńestiń, jýrnalister klýbynyń jáne basqa da qurylymdardyń jumysy qaita suryptalyp, ózektendiriletin bolady», - dedi Qyrymbek Kósherbaev.
