Qazaqstan halqy Assambleiasynyń keńesi QHA men Assambleia keńesiniń jańa quramyn maquldady, dep habarlaidy QazAqparat.
Assambleia keńesiniń keńeitilgen otyrysynda QHA jáne Assambleia Keńesiniń quramyna ózgerister men tolyqtyrýlar engizý máselesi qaraldy.
«Qazirgi quram QR Prezidentiniń 2020 jylǵy 23 qarashadaǵy sheshimimen bekitildi. Sonymen qatar, QHA sessiiasynyń 2021 jylǵy 28 sáýirdegi sheshimimen assambleiany basqarý quqyǵyn QR Prezidentine berý, sondai-aq QHA qurmetti tóraǵasy mártebesin QR Tuńǵysh Prezidenti – Elbasyna bekitý máselesi maquldandy», - dedi QHA Tóraǵasynyń orynbasary-Hatshylyq meńgerýshisi Marat Ázilhanov.
Ol sondai-aq, etnosaralyq qatynastar salasyndaǵy memlekettik saiasatty jetildirý sheńberinde etnosaralyq kelisimdi qamtamasyz etý júiesin jańǵyrtý júrgizilgenin atap ótti.
«QHA hatshylyǵy jergilikti jerlerde Assambleia quramdaryn qalyptastyrý tásilderin ázirledi jáne qalalar men oblystardyń QHA tóraǵalaryna (ákimderge) jiberildi. Sol boiynsha óńirlerde Assambleia múshelerin rotatsiialaý jumysy júrgizildi», - dedi Marat Ázilhanov.
Onyń aitýynsha, óńirlik Assambleia quramyna etnomádeni birlestikterdiń, QHA qurylymdarynyń, ǵylymi jáne shyǵarmashylyq intelligentsiianyń, qoǵamdyq birlestikter men jastar uiymdarynyń, memlekettik organdar men óńirlerdiń usynystaryna sáikes qoǵamdyq pikir kóshbasshylarynyń ókilderi kirip otyr.
«Assambleia quramy 523 músheden turady. Onyń ishinde ortalyq deńgeide – 105, óńirlik deńgeide 418 múshesi bar. Osylaisha, Assambleianyń óńirlik quramdaýyshyn, sondai-aq jastar segmentin aitarlyqtai keńeitý kózdeledi. Assambleia quramynda barlyǵy 39 etnikalyq top bar», - dedi QHA Tóraǵasynyń orynbasary.
Sondai-aq QHA keńesiniń quramy jańartylady.
«Keńes quramy 76 músheden (buryn 72 múshe bolǵan) turady, oǵan Memleket basshysy, Prezident Ákimshiligi men Tuńǵysh Prezident - Elbasy Keńsesiniń basshysy, Aqparat jáne qoǵamdyq damý, Mádeniet jáne sport, Bilim jáne ǵylym ministrleri, Nur-Sultan, Almaty, Shymkent qalalarynyń, oblystardyń ákimderi kirdi. Olar da jergilikti QHA tóraǵalary bolyp sanalady. Keńestiń 10 múshesi Parlament Májilisiniń, Keńestiń eki múshesi Parlament Senatynyń depýtattary ekenin aitý kerek, - dedi Marat Ázilhanov.
