Bilim salasynda da, azamattyq ortada da memlekettik tildi úiretetin ǵylymi turǵyda negizdelgen ádisteme kerek. QHA tóraǵasynyń orynbasary Janseiit Túimebaev Elbasynyń osy sharýaǵa QHA Ǵylymi-sarapshy keńesi atsalysýy kerektigin málim etti, dep habarlaidy QazAqparat.
«HHI ǵasyr adamzat úshin altyn ǵasyr bola almady. Halyqaralyq sarapshylar aldaǵy bolashaqta jańa jahandyq daǵdarystyń týyndaityny týraly kóbirek aita bastady. Bul daǵdarysty koronavirýs pandemiiasynyń tipti údedetin túri bar. Ekonomikalyq qiyndyqtar álbette saiasi, áleýmettik, etnikalyq jáne dini problemalardy da qozǵaityny sózsiz. Qurlyqtardyń bárinde qaqtyǵys kóbeiip ketti. Olardyń qai-qaisy da jahandyq sipatqa ie bolyp ketýi múmkin. Ekonomikalyq daǵdarys pen pandemiianyń saldary áleýmettik problemalardy ýshyqtyryp, ultaralyq qarym-qatynasqa da salqynyn tigizýi ábden yqtimal», - dedi Janseiit Túimebaev QHA Ǵylymi-sarapshy keńesiniń keńeitilgen otyrysynda.
Onyń aitýynsha bul rette Qazaqstandaǵy da birqatar jaǵdai etnosaralyq saiasatqa jan-jaqty taldaý kerektigin kórsetip bergen.
«Jańa ádistemeler men amaldar kerek. Árine, Qazaqstan halqy Assambleiasy 25 jyldyń ishinde orasan zor jumysty atqardy. Ultaralyq qarym-qatynas salasynda memlekettik saiasat júrgizetin ýákiletti organ – Aqparat jáne qoǵamdyq damý ministrligine qarasty ultaralyq qarym-qatynasty nyǵaitý komiteti quryldy. Onyń janynda sonymen qatar tuńǵysh ret qurylǵan qoldanbaly etnosaiasi zertteýlerdi júrgizý ortalyǵy jumysyn bastady. Odan bólek Qoǵamdyq kelisim birlestiginiń de jumysy qyzý», - dedi ol.
Janseiit Túimebaev ultaralyq qarym-qatynas bilim, mádeniet, til saiasaty salasyndaǵy kóptegen jumysty júrgizýge tikelei bailanysty ekenin jetkizdi. Sondai-aq ol Elbasy assambleia keńesinde jańa inkliýzivti saiasatqa suranys baryn málim etkenin eske saldy.
«Memlekettik til biriktirýshi faktorǵa ainalýǵa tiis. Ol elimizdiń birligin bekemdei túsedi. Bizge bilim salasynda da, azamattyq ortada da memlekettik tildi úiretetin ǵylymi turǵyda negizdelgen ádistemesi kerek. Elbasy bul turǵyda tapsyrma berdi. QHA Ǵylymi-sarapshylyq keńesi bul jumysqa óz úlesin qosýy tiis», - dedi ol.
