Qazaqstan halqy Assambleiasy Qordaidaǵy oqiǵaǵa qatysty málimdeme jasady, dep habarlaidy "Ult aqparat".
«Qordaidaǵy oqiǵa el azamattarynyń árbiriniń júregine qanjardai qadaldy. Oqiǵa kezinde azamattarymyz kóz jumdy. Qazaqstan halqy assambleiasy kóz jumǵan azamattardyń týǵan-týystary men jaqyndaryna qaiǵyra kóńil aita otyryp, zardap shekkenderdiń tezirek saýyǵyp ketýin tileidi. Memleket basshysy janjaldyń saldaryn eńserý boiynsha naqty tapsyrmalardy berdi. Biz Qazaqstan halqyn osynaý iske ún qosyp, qoldaý bildirýdi suraimyz», - delingen QHA málimdemesinde.
Assambleia eldiń barlyq óńirinde etnomádeni birlestikterdiń basyn qosyp túsindirý jumystaryn júrgizilip jatqanyn habarlaidy.
«Assambleia músheleri kez kelgen qylmystyń ulttyq sipaty bolmaityny, sondai-aq kinálilerdiń bári zańǵa sáikes anyqtalyp, jazalanýy kerektigi jaily ortaq pikir bildiredi. Sondyqtan qazirgi kezdegi eń mańyzdy mindet - arandatýshylyqqa boi aldyrmai, jeke adamdardyń jasaǵan áreketterin tutas ulttarǵa telýge jol bermeý. Assambleia halyqtyń danalyǵyna senim bildiredi ári bizdiń azamattarymyzdy, ásirese jastardy eldegi beibitshilik pen kelisimdi buzatyn jáne ózderine ziian keltiretin óreskel sózder men áreketterden aýlaq bolýǵa shaqyrady. Qazaqstan halqy árqashan bir-birimen baýyrlastyq qarym-qatynastyń úlgisi bolyp qala beretinine senimdimiz. Balalarymyzdyń ortaq bolashaǵy úshin biz ultaralyq arazdyqty qozdyrýǵa jol bermeýimiz kerek», - deidi QHA málimdemesinde.
Sonymen qatar QHA jalǵan málimetke senbei, qoǵamdyq tártip pen qaýipsizdikti qamtamasyz etetin organdarǵa kómek kórsetýge, eldegi tynyshtyq pen beibitshilikti saqtaýǵa shaqyrady.
