Foto: Úkimet
QR Premer-ministri Oljas Bektenovtiń tóraǵalyǵymen ótken Úkimet otyrysynda týristerdiń elimizde jaily jáne qaýipsiz demalysyn qamtamasyz etý máselesi qaraldy, dep habarlaidy Ult.kz.
Úkimet otyrysy barysynda QR týrizm jáne sport ministri Erbol Myrzabosynov elimizdiń týristik salasy jyl saiyn damyp, áleýetin arttyryp kele jatqanyn baiandady. Máselen, 2024 jyly otandyq týrister sany 10,5 mln; sheteldik kelýshiler – 15,3 mln teńgeni qurady. Búgingi tańda 87 memleket úshin vizasyz rejim qarastyrylǵan, 107 shet memleket azamattary elektrondy túrde viza rásimdeý múmkindigine ie.
«Memleket basshysy týrizm indýstriiasy ekonomikalyq ósimniń mańyzdy draiveri ekenin birneshe ret atap ótti. Biz Qazaqstannyń sheteldik týristerge dostyq peiili bar, emin-erkin demalýǵa qolaily el retinde tartymdylyǵyn arttyrý úshin qajetti jaǵdai jasaýymyz kerek. Bul baǵytta aýqymdy jumys atqarylýda. Halyqaralyq áýe qatynastarynyń, temirjol jáne avtokólik baǵyttarynyń geografiiasy keńeitilýde. Sheteldik azamattar úshin kóshi-qon rásimderin jeńildetý qolǵa alyndy», — dep atap ótti Oljas Bektenov.
Kelgen qonaqtardyń emin-erkin ári qaýipsiz demalysyna erekshe kóńil bólinip otyr. Mysaly, Almaty, Shyǵys Qazaqstan jáne Jetisý oblystarynda kórshiles elderden kelgen týristerdi qabyldaý jumystary júrgizildi. Bul tájiribeni keńinen taratý qajet.
Oljas Bektenov týrister úshin kelgen sátten bastap, búkil sapar marshrýty boiynsha jáne elden ketkenge deiin qolaily jaǵdai jasaýdy tapsyrdy.
Premer-ministr týristik ónimderdi naqty týristik toptardyń, ásirese, shekaralas óńirlerdegi týristerge beiimdegen jón ekenin basa aitty.
«Munyń shaǵyn jáne orta biznestiń qyzmetine ǵana emes, sondai-aq baǵdarlamalyq-tsifrlyq ónimderge de qatysy bar. Týristik lokatsiialarda sapaly uialy bailanys pen internet bolýǵa tiis. Qonaq úiler men týrister jii baratyn basqa da oryndarda qyzmet kórsetý sapasy men qaýipsizdik deńgeiine, sondai-aq baǵa saiasatynyń qolaily bolýyna nazar aýdarý kerek. Týrister úshin kelgen sátten bastap, búkil sapar marshrýty boiynsha jáne elden ketkenge deiin qolaily jaǵdailardy qamtamasyz etý qajet», — dep atap ótti Oljas Bektenov.
Atalǵan jumysty Týrizm, Ishki ister jáne Tótenshe jaǵdailar ministrlikteri men ákimdikterge birlesip júrgizý tapsyryldy.
«Bul ásirese, qaýip deńgeii joǵary aimaqtarǵa qatysty. Taýdaǵy demalysqa arnalǵan qural-jabdyqtar men kerek-jaraqtardy túgendep, týristerdiń qaýipsizdik tehnikasy týraly bilim deńgeiin arttyrýdy, sondai-aq týrister úshin yńǵaily ári qaýipsiz infraqurylym qurýdy baqylaýǵa alý qajet», — dep atap ótti Oljas Bektenov.
