QR Din isteri jáne azamattyq qoǵam ministri Nurlan Ermekbaev Qazaqstan imamdarynyń jalaqy mólsherin jariialady, dep habarlaidy Ult.kz tilshisi QazAqparat agenttigine silteme jasap.
«Úlken qalalarda imamdardyń turmystyq jaǵdaiy birshama turaqty bolsa, shalǵai jáne shaǵyn eldi mekenderde olardyń jaǵdaiy nasharlaý. Imamdardyń jalaqysy tikelei sadaqa jáshikterine túsken qarajatqa bailanysty bolady. Máselen, kei aýyldarda meshit imamdaryna 20 myń teńge jalaqy tólenedi», - dedi N.Ermekbaev Ortalyq kommýnikatsiialar qyzmetinde ótken baspasóz máslihatynda.
Ministrlik keltirgen derekterge sáikes, qalalyq jáne oblystyq meshitterde imamdardyń ailyq jalaqysy 70 myńnan 80 myńǵa, aýdandyq meshitterde - 40 myńnan 50 myńǵa, aýyldyq meshitterde - 20 myńnan 30 myń teńgege deiin bekitilgen. Biraq, atalǵan jalaqy kólemi de turaqty emes. Qazaqstan musylmandary Dini basqarmasy imamdardyń eńbekteri men meshitterdiń qyzmetkerlerine tóleitin arnaiy qarajatty resmi túrde bólmeidi jáne óz biýdjetinde bul másele qarastyrylmaǵan. Jergilikti ákimdikter QMDB óńirlik bólimderine turaqsyz jáne júiesiz túrde kómek kórsetedi.
«Mundai az ári turaqsyz jalaqymen imamdar qoǵamdyq qaýipsizdikpen tyǵyz bailanysty kúndelikti mindetterin tolyǵymen atqara almaidy. Bilikti imamdardy aýyldyq meshitterge tartý qiyndyq týǵyzyp jatyr. Onyń ústine imamdardyń kópshiligi orta bilimmen ǵana shektelgen. Bul imamdardyń aýditoriiasyn keńeitýge jáne destrýktivti dini aǵymnyń ókilderine qarsy turýǵa múmkindik bermeidi. Osyndai teris faktorlardy destrýktivtik dini aǵymdardyń ókilderi dástúrli islam dininiń bedelin álsiretýge jáne dindarlar arasynda ózderiniń yqpalyn arttyrý úshin tiimdi qoldanady», - dep tolyqtyrdy ministr.
Sonymen birge, ministr imamdardyń turmys jaǵdaiyn qamtamasyz etý - mamyr aiynda qurylǵan «Ýaqyp» qorporativtik qaiyrymdylyq qorynyń basym baǵyttarynyń biri ekenin atap ótti.
Qazirgi ýaqytta respýblika boiynsha 158 imamnyń jetispeýshiligi sezilip otyr. Ásirese, Aqmola oblysynda - 40 imam, Ońtústik Qazaqstan oblysynda - 37 imam jáne Shyǵys Qazaqstan oblysynda - 20 imam qajet.
