Qazaqstan Ilon Mask zymyranymen Jerserik ushyrady. Bul týraly búgin «Digital Bridge» halyqaralyq innovatsiialyq forýmynda QR Qorǵanys jáne aeroǵarysh ónerkásibi vitse-ministri Marat Nurǵojin aitty, dep habarlaidy QazAqparat tilshisi.
«Ǵarysh ǵylymy bir ornynda turmaidy. Bizdiń institýttar Jerde ǵaryshtyq tehnologiialardy paidalanýǵa múmkindik beretin ǵaryshtyq bailanys, jerseriktik navigatsiia syndy kóptegen baiypty qurylǵylar ázirleýde. Aǵymdaǵy jyly biz salmaǵy 6 tonnaǵa deiin jetetin ǵarysh apparatynyń qurastyrý-synaý kesheniniń qurylysyn aiaqtaityndyǵymyzdy atap ótkim keledi», - dedi ol forýmnyń «Ǵaryshtyq innovatsiianyń álemdik arenasyndaǵy Qazaqstannyń áleýeti» atty sessiiasynda.
Osy rette vitse-ministr ótken jyly Qazaqstan arnaiy konstrýktorlyq-tehnologiialyq biýrony iske qosqanyn atap ótti. Qazaqstandyq 150-den astam injenerdiń Eýropa, Ulybritaniia jáne Reseidiń zaýyttarynda taǵlymdamadan ótkenin aitty.
«Olar Qazaqstanda jumys isteýde jáne biz ózimizdiń ǵylymi-tehnologiialyq maqsattaǵy úshinshi ǵaryshtyq júiemizdi qurdyq. Eger barlyǵy da durys bolsa, onda 19 qarashada Kaliforniiada Falcon 9 ǵarysh tasymaldyǵyshymen 2 jerserigin ushyramyz. Jáne de injenerlerimiz ben konstrýktorlarymyzdyń barlyq ázirlemesin ǵaryshta aprobatsiialaimyz. Iaǵni, olar ushý tájiribesin alady jáne kommertsializatsiialaýǵa jáne menshikti jerserikti osy jerde qurýǵa múmkindik beredi. Bul, eń aldymen, qoldanystaǵy apparattyń ornyn basatyn bailanys jerserigi bolady», - dedi Marat Nurǵojin.
Aita keteiik, forýmnyń tsifrlyq ekonomikany damytýdyń jahandyq trendteri talqylanǵan jalpy otyrysyna qatysqan Premer-Ministr «Digital Bridge» úlken bailanystar jasalatyn alańǵa ainalatyndyǵyn, Qazaqstan tek qana tsifrlyq kún tártippen ómir súrip jatqanyn aitqan edi.
Digital Bridge - Qazaqstandaǵy biylǵy jyly ótip otyrǵan basty innovatsiialyq oqiǵa.
Qatysýshylar forýmnyń dialogtik alańynda tsifrlandyrý salasyndaǵy sońǵy álemdik trendterdi talqylap, aldyńǵy qatarly tájiribelermen jáne biznes-modeldermen bólisti. Digital Bridge forýmy tsifrlyq transformatsiia, elektrondyq úkimet, tehnologiialyq kásipkerlik jáne 4-shi ónerkásiptik revoliýtsiia ideialaryn ilgeriletýge arnalǵan Eýropa men Aziia elderiniń arasyndaǵy dialogtik alańdy quraityn jyl saiynǵy is-shara bolady dep kózdelýde.
