Qazaqstan ǵalymdary álemdegi COVID-19-ǵa qarsy alǵashqy tiri vaktsinanyń klinikaǵa deiingi synaǵyn ótkizýdi aiaqtaýǵa jaqyn, dep habarlaidy QazAqparat.
Bul týraly búgin Úkimet otyrysynda Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakaria aitty.
«2020 jyly COVID-19-ǵa qarsy QazCovid-in (saýdalyq ataýy QazVac) inaktivtelgen vaktsinasy jáne QazCoVac-P qarsy sýbbirlikti vaktsinasy ázirlenip, klinikalyq zertteýlerden ótti. 2021 jyly COVID-19 qarsy kapripoksvirýs negizindegi jáne tumaý virýsyna negizdelgen vektorlyq vaktsinalar jasaldy. Ekeýi de klinikaǵa deiingi synaqtardan ótti. Sodan soń álemdegi COVID-19-ǵa qarsy alǵashqy tiri vaktsinasy jasaldy. Ol klinikaǵa deiingi synaqtardyń aiaqtalý kezeńinde», - dedi ol.
Sonymen qatar mekemeniń bas direktory sońǵy jyldardaǵy negizgi ǵylymi jetistikterine toqtaldy.
«2018 jyly sheteldik balamalardan úsh ese arzan baǵamen nodýliarlyq dermatitke qarsy vaktsina ázirlendi. Respýblikalyq biýdjettiń 6 mlrd teńge qarjysy únemdeldi. 2019 jyly brýtsellezge qarsy jańa vektorlyq vaktsina jasaldy. 2020 jyly túie sheshegine qarsy vaktsina ázirlenip, Aýyl sharýashylyǵy ministrliginiń tapsyrysy boiynsha óndirildi. Vaktsina aýrýdyń taralýyna jol bermedi», - dedi Kúnsulý Zakaria.
